अंजली दमानिया व प्रीती मेनन शर्मा विरोधात मुक्ताईनगर न्यायालयाचे पकड वारंट 

मुक्ताईनगर : माजी मंत्री एकनाथराव खडसे यांच्यावर विविध बेछूट आरोप करून बदनामी केल्याप्रकरणी मुंबईस्थित समाजसेविका अंजली दमानिया व आप पक्षाच्या कार्यकर्त्या प्रिती मेनन शर्मा  यांच्या विरोधात मुक्ताईनगर न्यायालयाचे न्यायाधिश आर.एच.मानकर यांनी गुरुवारी पकड वॉरंट जारी केले. हे वॉरंट हस्ते पाकिटातून बजावण्यात येणार आहे. त्यामुळे अंजली दमानिया व प्रिती मेनन शर्मा या जेथे असतील तेथे त्यांना अटक होवू शकण्याची शक्यता वर्तवली जात आहे.

जावयाची लिमोझीन कार, भोसरी भूखंड प्रकरण, अपसंपदा गोळा करणे, कार्यकर्त्याचे लाच प्रकरण आदी विषयांवर बेछूट आरोप अंजली दमानिया व प्रिती मेनन शर्मा  यांनी जळगावात येऊन केले होते. या प्रकरणी मुक्ताईनगर भाजपचे माजी तालुकाध्यक्ष रमेश ढोले व निवृत्ती पाटील यांनी खडसेंची बदनामी केल्याचा (खटला क्रमांक 16516) व (खटला क्रमांक 19616) ने   ( कलम (500 व 501) नुसार सन 2016 ला  दाखल केला आहे. या खटल्याचे रितसर समन्स प्राप्त होवूनही अंजली दमानिया  कोर्टात हजर होत नसल्याने व प्रिती मेनन शर्मा यांचे वकील तारखेवर हजर होत होते हे कोर्टाला मान्य नसल्याचे सांगत न्यायालयाने शनिवारी अंजली दमानिया व प्रिती शर्मा या द्वयींविरोधात न्यायाधिशांनी पकड वॉरंट काढले. या खटल्यात फिर्यादीतर्फे अ‍ॅड.व्ही एच पाटील व अ‍ॅड. संतोष सी टावरी हे  काम पाहत आहेत.