अन्नदान हे सर्वात श्रेष्ठ कार्य – गिरीश बापट

0
मंत्री गिरीश बापट यांच्याहस्ते किचन ट्रस्टचे उद्घाटन
पिंपरी : समाजात चांगल्या कार्याची माहिती लवकर पोचत नाही. मात्र वाईट कार्याची माहिती वार्‍यासारखी पसरते. असे म्हणत अन्नदान करणे हे श्रेष्ठ कार्य असल्याचे मत पालकमंत्री गिरीश बापट यांनी व्यक्त केले. रुग्णांना मोफत भोजन पुरविणार्‍या महाराजा अग्रसेन किचन ट्रस्टचे चिंचवड येथे उद्घाटन करण्यात आले. त्यावेळी ते बोलत होते. अगरवाल फेडरेशनचे उपाध्यक्ष विनोद बंसल, उद्योजक प्रेमचंद मित्तल, अग्रसेन ट्रस्ट चिंचवड प्राधिकरणचे अध्यक्ष सुभाष बन्सल, भाजपा व्यापारी आघाडीचे शहर उपाध्यक्ष सुधीर आगरवाल, रामअवतार अगरवाल, पन्नालाल गुप्ता, वेदप्रकाश गुप्ता, राजेश आगरवाल, महाराजा अग्रसेन किचन ट्रस्टचे अध्यक्ष कृष्णलाल बंसल आदी मान्यवर यावेळी उपस्थित होते. दरम्यान, उद्योजक अगरवाल, विनोद गोयल, विजय गोयल, जगदीश गोयल, रामशरण गुप्ता, भगवानदास आगरवाल, कमलनाथ बंसल, प्रेमप्रकाश गोयल, विजय सिंघल, रोहित गुप्ता, सामाजिक कार्यकर्ते एम. ए. हुसैन यांच्यासह अनेक दानशूर व्यक्तींना सन्मानित करण्यात आले.
चार हजार रुग्णांनी घेतला लाभ..
बापट पुढे म्हणाले की, दुष्काळग्रस्त भागातील पुण्यात शिक्षणासाठी आलेल्या विद्यार्थ्यांसाठी काहीतरी करण्यासाठी अगरवाल समाजाने पुढाकार घ्यावा. व्यवहार कसा करावा हे आगरवाल समाजाकडून शिकावे. हा समाज सत्कारणी लागेल अशा उपक्रमावरच खर्च करतात. या समाजातील काही कार्यकर्ते एकत्र येवून महाराजा अग्रसेन जयंतीच्या दिवसापासून वायसीएम रुग्णालयात हा उपक्रम सुरू केला आहे. याचा आजतागायत 4 हजार रुग्णांनी लाभ घेतला. रुग्णाना मोफत भोजन पुरवठा करण्यासाठी सामाजिक कार्यकर्ते एम. ए. हुसैन यांचे यासाठी मोठे सहकार्य मिळत आहे. भविष्यात पुणे व पिंपरी- चिंचवड शहरातील अनेक रुग्णालयात हा उपक्रम राबविण्यात येणार असल्याची माहिती ट्रस्टचे अध्यक्ष सीए कृष्णलाल बंसल यांनी दिली. कार्यक्रमाचे संयोजनासाठी सचिव मुकेश अगरवाल, खजिनदार संजीव आगरवाल यांनी पुढाकार घेतला. आभार संजीव अगरवाल यांनी मानले.