अयोध्येत रामाचं नाही तर गौतम बुद्धाचं मंदिर उभारा – खासदार सावित्रीबाई फुले

लखनऊ : अयोध्येमध्ये रामाचं नाही तर गौतम बुदधांचं भव्य मंदिर उभारा अशी मागणी भाजपच्या बहराइचच्या खासदार सावित्रीबाई फुले यांनी केली आहे. बुद्ध धर्म जगातील सर्वश्रेष्ठ धर्म असल्याचं प्रतिपादनही फुले यांनी यावेळी केलं.

मुख्यमंत्री योगी आदित्यनाथ यांनी काही दिवसांपूर्वी अयोध्येत रामाचं मंदिर बांधण्याची तयारी सुरू केल्याचं विधान केलं होतं. यावर प्रतिक्रिया देताना वादग्रस्त जमिनीवर रामाचं मंदिर मुळी कधी नव्हतेच असा युक्तीवाद सावित्रीबाई फुले यांनी केला आहे.’ वादग्रस्त ठिकाणी झालेल्या उत्खननात बुद्धाच्या मूर्ती सापडल्या आहेत .तसंच इतर ही वस्तू हेच सांगतात की तिथे रामाचं नाही तर बुद्धाचं मंदिर होतं. त्यामुळे अयोध्येत बुद्धाचं भव्य दिव्य मंदिर उभाराव’. गेले ४ वर्ष सावित्रीबाई फुले भाजपच्या खासदार असूनही भाजपवर जोरदार टीका करत आहेत. तसंच आरक्षण बदलण्याच्या मोहन भागवतांच्या विधानावरही त्यांनी कडाडून टीका केली. संघ आणि भाजप विरोधात १६ डिसेंबरपासून त्या निषेध यात्राही काढणार आहे. भाजपत राहूनही भाजपचा विरोध कसा करता असा प्रश्न त्यांना विचारला असता त्या म्हणाल्या,’ भाजपचा आणि माझा काहीएक संबंध नाही. मी जिंकण्यायोग्य उमेदवार वाटले म्हणून त्यांनी मला तिकीट दिलं. माझा विजय हा सर्वस्वी माझाच आहे. त्यात भाजपचा काडीमात्र वाटा नाही. त्यामुळे मी त्यांचा विरोध करत राहणार’ असंही त्यांनी सांगितलं.