अवैध वाळू वाहतूक करणारे ट्रॅक्टर जप्त

जळगाव : तालुक्यातील दापोरा गावातील गिरणा नदीपात्रातून अवैधपणे वाळूची वाहतूक करणार्‍या ट्रॅक्टरवर पोलिसांनी कारवाई करीत ट्रॉलीसह ट्रॅक्टर व दीड ब्रास वाळू जप्त केली.

अवैध वाळू वाहतूक ऐरणीवर
गिरणा नदीपात्राातून वाळूचे उत्खनन करीत त्याची दापोरा ते शिरसोली रोडने अवैधपणे वाहतूक केली जात असल्याची माहिती तालुका पोलिस स्टेशनचे पोलिस निरीक्षक रामकृष्ण कुंभार यांना मिळाल्यानंतर त्यांनी कारवाईच्या सूचना केल्या. पोलिस उपनिरीक्षक गणेश सायकर, सहाय्यक फौजदार नितीन पाटील, पोलिस हेड कॉन्स्टेबल विश्वनाथ गायकवाड, हरीलाल पाटील, संजय भालेराव तसेच चालक अशोक पाटील यांच्या पथकाने बुधवारी शिरसोली रोडवर वाळूची वाहतूक करणार्‍या ट्रॅक्टरवर कारवाई केली. कर्मचारी ट्रॅक्टरमधील वाळूची तपासणी करत असतांना ट्रॅक्टरवरील तिघेही पसार झाले. कालु भिल (शिरसोली) व पारस संजय सोनवणे (जळगाव), रवींद्र शिवाजी आटोळे (रा.धानोरा) अशी पसार झालेल्या तिघांची नावे आहेत. पोलिसांनी ट्रॉलीसह ट्रॅक्टर तसेच ट्रॅक्टरमधील दीड ब्रास वाळू जप्त केली. या प्रकरणी पोलिस हेड कॉन्स्टेबल विश्वनाथ गायकवाड यांच्या फिर्यादीवरुन तिघांविरोधात तालुका पोलिसात गुन्हा दाखल करण्यात आला. पुढील तपास पोलिस हेड कॉन्स्टेबल हरीलाल पाटील करीत आहेत.