अ‍ॅपच्या माध्यमातून आता स्वत:च भरा आयकर
नवी दिल्ली । जून आणि जुलै महिन्यात इन्कम टॅक्स भरण्यासाठी मोठी लगबग बघायला मिळते. अनेकांना या प्रोसेसमध्ये अनेक अडचणी येतात. त्यामुळे सीएच्या मदतीशिवाय अनेकांना काहीच पर्याय नसतो. याचाच विचार करून करदात्यांना आयकर भरणे अधिक सोपे व्हावे, या उद्देशाने सरकारने महत्त्वाचे पाऊल उचलले आहे. ऑल इंडिया आयटीआर या सरकारी ई-फायलिंग वेबसाइटने आयकर भरण्यासाठी अ‍ॅप विकसित केले आहे.
आयटीआरचे संस्थापक आणि संचालक विकास दहिया यांनी दिलेल्या माहितीनुसार, आयकर भरण्याची प्रक्रिया अधिक सोपी आणि जलद होणार आहे. या अ‍ॅपच्या माध्यमातून करदात्याला स्वत:चा आयकर भरता यावे, यासाठी मोबाइल अ‍ॅप विकसित करण्यात आले आहे. या अ‍ॅपमुळे आयकर भरण्यासाठी यातील तज्ज्ञांची मदत घेण्याची गरज भासणार नाही आणि त्यासाठी पैसेही खर्च करावे लागणार नाही. आयकर भरण्यासोबतच रिफंड स्टेटस, एचआरएमधील सूट इत्यादी सुविधाही या अ‍ॅपच्या माध्यमातून उपलब्ध होणार आहेत. विशेष म्हणजे करदात्यांना करासंदर्भात अनेक प्रश्‍न किंवा शंका असतात. अशा प्रश्‍नांचे निरसन करण्यासाठीही विशेष सुविधा यात असेल.