आई-वडिलांनी शॉपिंगसाठी न नेल्याने विद्यार्थिनीची आत्महत्या

नागपूर : आई-वडिलांनी दिवाळी शॉपिंगसाठी न नेल्याने २१वर्षीय विद्यार्थिनीने गळफास घेऊन आत्महत्या केल्याची घटना वसंतनगरमधील जुना बाबुळखेडा भागात मंगळवारी सकाळी उघडकीस आली. या घटनेने परिसरात हळहळ व्यक्त करण्यात येत आहे. पायल दत्तराज करडभाजने ,असे मृत विद्यार्थिनीचे नाव आहे. ती धनवटे कॉलेजमध्ये बी. कॉम (सीएस) द्वितीय वर्षाला शिकत होती.

दत्तराज त्यांच्या पत्नी, लहान मुलगी व मुलगा हे दिवाळीच्या खरेदीसाठी सोमवारी बाजारात गेले होते. ‘तू नेहमी ऑनलाइन खरेदी करते,आताही तुझ्या पसंतीचे ऑनलाइन कपडे मागवून घे,’ असे ते पायलला म्हणाले. करडभाजने कुटुंब खरेदी करून आले. वडिलांनी खरेदीसाठी न नेल्याने पायलला दु:ख झाले. मंगळवारी सकाळी तिने तिच्या खोलीत गळफास घेऊन आत्महत्या केली. पायल खोलीतून बाहेर न आल्याने दत्तराज यांनी तिला आवाज दिला. प्रतिसाद मिळाला नाही. खिडकीतून बघितले असता पायल गळफास लावलेली दिसली. त्यांनी दरवाजा तोडला. अजनी पोलिसांना घटनेची माहिती दिली. माहिती मिळताच अजनी पोलिस घटना स्थळी दाखल झाले. पंचनामा करून मृतदेह उत्तरीय तपासणीसाठी रुग्णालयाकडे रवाना केला. अजनी पोलिसांनी आकस्मिक मृत्यूची नोंद करून तपास सुरू केला आहे.