आजीबाईंनी लुटला भोंडल्याचा आनंद!

पुणे । ‘ऐलमा पैलमा गणेश देवा, एक लिंबू झेलू बाई, कारल्याचा वेल लाव सुने, असं कसं झालं माझ्या नशिबी आलं, अक्कल माती चिकन माती, आडबाई आडोनी’ अशी पारंपरिक गाणी म्हणत निवारा वृद्धाश्रमातील महिलांनी भोंडल्याचा आनंद लुटला!

सुयोग मित्र मंडळ आणि चतुःशृंगी मंदीर ट्रस्टच्या वतीने चतुःशृंगीच्या यात्रेत आजीबाईंच्या भोंडल्याचे आयोजन केले होते. ज्येष्ठ महिलांनी आपल्या बालपणीच्या आठवणी जागवल्या. फेर धरत, झिम्मा आणि फुगड्या खेळत महिलांनी आनंद लुटला. खिरापत वाटपानंतर देवीच्या दर्शनाची व्यवस्था करण्यात आली होती. ट्रस्टचे अध्यक्ष गंगाधर अनगळ म्हणाले, भोंडला हा पश्चिम महाराष्ट्र व कोकणात प्रचलित असलेला महिलांचा सामुदायिक खेळाचा प्रकार आहे. नवरात्रीच्या नऊ दिवसांत हस्त नक्षत्राचे प्रतिक असलेल्या हत्तीची प्रतिमा काढून तिच्याभोवती महिला व मुली फेर धरतात. पृथ्वीच्या सुफलीकरणाचा हा उत्सव आहे. वृद्धाश्रमातील महिलांना स्मृतींना उजाळा देता यावा आणि आनंद मिळावा यासाठी गेली सात वर्षे सुयोग मित्र मंडळाच्या सहकार्याने या उपक्रमाचे आयोजन करण्यात येते. नंदा माने, अश्‍विनी अदवडे, वर्षा खामकर, मनिषा तडके, सारिका धुमाळ, अनुराधा मांडवकर, मनिषा सुपेकर, संगीता वाईकर, रंजना पवार, सुवर्णा कानिटकर, सुनंदा मोहिते, पल्लवी शर्मा यांनी संयोजन केले.