आता इमान जेवते स्वतःच्या हाताने

अबुधाबी । जगातील सगळ्यात वजनदार महिला म्हणून ओळखल्या जाणार्‍या इमान अहमदवर सध्या अबू धाबीमध्ये उपचार सुरू आहेत. उपचाराला योग्य प्रतिसाद इमानकडून दिला जातो आहे. इमानमध्ये होत असलेल्या सुधारणेची चिन्हसुद्धा दिसायला लागली आहेत. इमान आता तोंडाने खाऊ शकते महत्वाचे म्हणजे ती स्वतःच्या हाताने जेवायचा सराव करते आहे. गेली तीन महिने तिला अन्ननलिकेने जेवण दिले जाते होते.

मुंबईमधून तीन आठवड्यांपूर्वी इमानला उपचारासाठी अबुधाबीला हलवण्यात आले होते. तीन आठवड्यांतच तिने उपाचाराला प्रतिसाद द्यायला सुरुवात केली आहे. ‘सुरुवातीला इमानला दोन-तीन चमचे अन्न दिले जात होते. पण आता ती दिवसाला पंधरा चमचे अन्न खायला लागली आहे. आनंदाची गोष्ट म्हणजे गेली दोन दिवस ती अर्ध्यापेक्षा जास्त जेवण स्वतःच्या हाताने खाते आहे’, अशी माहिती बुर्जील हॉस्पिटलचे मुख्य वैद्यकीय अधिकारी अल्ल शाहत यांनी दिली आहे. छत्तीस वर्षीय इमान अहमद तीन महिन्यांआधी जगातील सगळ्यात वजनदार महिला म्हणून ओळखली जायची. सुरुवातीला मुंबईमध्ये तिला उपचारासाठी पाठविण्यात आलं होतं. त्यानंतर पुढील उपचारासाठी अबुधाबी इथे पाठवण्यात आले आहे.

मुंबईतील सैफी हॉस्पिटलमध्ये इमानवर बॅरिऍट्रिक सर्जरी करण्याआधी तिला लिक्विड डाएटवर ठेवण्यात आले होते. तोंडाने खायला दिल्यास मज्जासंस्थेच्या कार्यावर परिणाम होऊ नये, यासाठी तीला अशा पद्धतीचे डाएट देण्यात आले होते. व्हीपीएस हेल्थकेअरसह इमानच्या उपचारासाठी वीस डॉक्टरांची टीम तयार करण्यात आली आहे. यामध्ये ऑर्थोपेडिक सर्जन, ह्रदयरोगतज्ज्ञ, नेफ्रोलॉजिस्ट, गॅस्ट्रोएन्त्रोलॉजिस्ट, प्लास्टिक सर्जन, फिजिओथिएरिपिस्ट तसेच आहास तज्ज्ञांचा समावेश आहे. इमानवर सध्या सुरू असलेल्या उपाचारासाठी तीन स्टेजचे मॉडेल या डॉक्टरांच्या टीमने तयार केले आहे. डॉक्टरांकडून तयार करण्यात आलेल्या तीन स्टेज मॉडेलवर विशेष भर दिला जाणार आहे. सुरूवातीला यूटीआय, बेडसोअर्स, स्पिच थिएरपी, आणि पुनर्वसन या गोष्टींवर विशेष भर दिला जाइल, दुसर्‍या स्टेजमध्ये पहिले उपचार सुरू ठेवण्यावर भर असेल महत्त्वाचे म्हणजे इमानचे पुनर्वसन करण्यावर जास्त भर दिला जाणार आहे. इमान अहमद ही इजिप्तची महिला वजन कमी करण्याच्या शस्त्रक्रियेसाठी मुंबईत आली होती.