आता मृत प्राण्यांचाही होणार सन्मान

पुणे : शहरात मृत पावणार्‍या प्राण्यांची यापुढे शास्त्रोक्त पद्धतीने विल्हेवाट लावण्यात येणार असून या प्रस्तावाला स्थायी समितीने मान्यता दिली आहे. त्यामुळे आपल्याला प्रिय असणार्‍या पाळीव प्राण्याची मरणोत्तर विल्हेवाटही सन्मानपूर्वक करण्याचा मार्ग नागरिकांना उपलब्ध झाला आहे.

पुणे महापालिकेच्या हद्दीत हजारो पाळीव आणि भटके प्राणी मृत्युमुखी पडतात. पिंपरी-चिंचवड महापालिकेने मृत प्राण्यांवर अंत्यसंस्कार करण्यासाठी सोय उपलब्ध करून दिली आहे. पुण्यात मात्र अशी कोणतीही सोय नसल्याने आरोग्याच्या दृष्टिकोनातून नागरिकांना अनेक समस्यांना सामोरे जावे लागते. या कामासाठी विशेष विद्युतदाहिनी उभी करण्याचा प्रस्ताव मागील पंचवार्षिकमध्ये शिवसेनेचे नगरसेवक पृथ्वीराज सुतार यांनी ठेवला होता. त्यासाठी प्रशासनाकडून अभिप्राय मागवण्यात आला होता. या अभिप्रायामध्ये मुंढवा केशवनगर सर्व्हे क्रमांक 9 ते 14/2 या ठिकाणी मृत प्राण्यांची विल्हेवाट लावण्यासाठी इन्सिनेरेटर प्लॅन्ट उभारण्यात आल्याचे नमूद करण्यात आले आहे. हा प्लॅन्ट लवकरच सुरू करण्यात येणार असून त्यामुळे मृत प्राण्यांची शास्त्रीय पद्धतीने विल्हेवाट लावता येणार असल्याचा उल्लेख यात करण्यात आला होता. त्यावर स्थायी समितीने हा प्रकल्प सुरू करण्यास हिरवा कंदील दाखवला आहे.