आत्महत्याग्रस्त शेतकर्‍यांच्या मुलांना सरकारी नोकरी – रावते
मुंबई । राज्यातील आत्महत्याग्रस्त शेतकर्‍यांच्या कुटुंबातील एका व्यक्तीला आता सरकारी नोकरीचा लाभ मिळणार आहे. गेल्या दोन वर्षांपासून शिवसेनेने ही मागणी केली होती. ज्याला मुख्यमंत्री देवेंद्र फडणवीस यांनी मान्यता दिल्याची माहिती परिवहन मंत्री दिवाकर रावते यांनी दिली. आत्महत्याग्रस्त शेतकर्‍यांच्या पाल्यांना केवळ परिवहन खातेच नव्हे, तर सर्वच सरकारी विभागांमध्ये क श्रेणीतील नोकरी दिली जाईल. मुख्यमंत्र्यांनी त्याला मान्यता दिली आहे, अशी माहिती दिवाकर रावते यांनी दिली.
कोणत्या प्रवर्गात नोकरी मिळणार?
आत्महत्याग्रस्त शेतकर्‍यांच्या मुलांना प्राधान्याने क वर्गात सरकारी नोकरी देण्यात येईल, परिवहनच नाही सर्व विभागांत त्यांना संधी दिली जाणार असल्याचे रावते यांनी सांगितले.
फायनान्शियल सेंटर बीकेसीतच होणार!
पंतप्रधान नरेंद्र मोदींच्या गुजरातची शान वाढवण्यासाठी मुख्यमंत्री देवेंद्र फडणवीस यांच्या स्वप्नातील इंटरनॅशनल फायनान्स सर्विस सेंटरचा बळी जाणार असल्याचं दिसत आहे. मुंबईतील बीकेसीत हे सेंटर होणार आहे. पण मोदींच्या बुलेट ट्रेनच्या स्टेशनसाठी बीकेसीतील 0.9 हेक्टर जागा द्यावी लागणार आहे. मात्र बुलेट ट्रेन आली तरी फायनन्शियल सेंटर होणारच, असं दिवाकर रावते यांनी म्हटलं आहे. बीकेसीतच हे फायनन्शियल सेंटर होईल, त्यासाठी जेवढी जागा बुलेट ट्रेनसाठी द्यावी लागेल, त्याचे पैसे घेतले जातील. त्या पैशातून फायनान्शियल सेंटरची इमारत बांधली जाईल, असं दिवाकर रावते यांनी सांगितलं.