आधार कार्ड नावनोंदणी आणि अद्ययावत सेवा संस्था उद्घाटन समारंभ

मनोर । भारतीय डाक विभाग पालघर विभाग मीरा रोड आयोजित आधार नावनोंदणी आणि अद्ययावत सेवा केंद्राचे उद्घाटन समारंभ डाकघर पालघर येथे उत्तम पिंपळे नगराध्यक्ष पालघर नगर परिषद यांच्या हस्ते उद्घाटन केले. पालघर पोस्टात आधार कार्ड केंद्र व अद्ययावतीकरणाच्या केंद्रामुळे बाहेरील खाजगी व खर्चावू ठिकाणी जाण्याची लोकांना गरज पडणार नसल्याचे प्रतिपादन नगराध्यक्ष उत्तम पिंपळे यांनी पालघर पोस्ट कार्यालयात नव्याने सुरू झालेल्या आधार कार्ड केंद्र व अद्ययावतीकरण केंद्राच्या उद्घाटनप्रसंगी केले.

परिसरातील लोकांनी या केंद्राचा जास्तीत जास्त लाभ घेण्याचे आवाहन अधीक्षक इंगळे यांनी केले. लोकांनी पोस्टाशी व्यवहार करावा जेणेकरून त्याना त्याचा चांगला लाभ होईल. लवकरच पोस्ट आपल्या दारी असा नावीन्यपूर्ण उपक्रम पोस्टामार्फत राबवण्यात येत असल्याची माहिती त्यांनी येथे दिली. त्याअंतर्गत बँकेच्या व्यवहाराप्रमाणे लोकांना पोस्टात व्यवहार करता येणे शक्य होईल. याही पुढे ग्राहकांना पोस्टातून पैसे काढावयाचे असल्यास वा भरावयाचे असल्यास त्यांना येथे येण्याची गरज लागणार नाही, तर ते पैसे ग्राहकांना थेट त्यांचा घरूनच जमा करता किंवा काढता येणार असल्याची माहितीही त्यांनी दिली. पालघरसोबत जिल्ह्याच्या कार्यकक्षेत येत असलेल्या सर्व 26 उप-विभागीय पोस्ट कार्यालयांमध्ये अशी केंद्रे स्थापन करण्यात आल्याची माहितीही त्यांनी यावेळी दिली.

320 रुपयांत 2 लाखांचा अपघाती विमा
पोस्टाच्या या आधार कार्ड केंद्रात या कार्यक्रमात मनीषा जैन यांनी लग्नानंतरचे नाव अद्ययावतीकरण करून येथील पहिल्या सेवेचा लाभ घेतला.या केंद्रात निःशुल्क नवीन आधार नोंदणीसाठी नाव नोंदवण्यात येणार असून आधार कार्डातील अद्ययावतीकरणासाठी 30 रुपयाचे शुल्क आधार कार्ड धारकांना द्यावे लागणार आहे. पोस्टाच्या विविध योजनांची माहिती यावेळी अधीक्षक इंगळे यांनी दिली तसेच पोस्टात बचत खाते काढून 320 रुपयांत 2 लाखांचा अपघाती किंवा नैसर्गिक विमा काढण्याचे आवाहन त्यांनी यावेळी उपस्थित पोस्टातील लोकांना केले. हे केंद्र सरकारी तसेच लोकोपयोगी व लोकांच्या हक्काचे केंद्र असून या केंद्रात येणार्‍या प्रत्येक आधार कार्ड धारकाला खात्रीलायक अद्ययावतीकरण व नवीन कार्डाची नोंदणी करण्यात येणार असल्याचे यादरम्यान पोस्ट मास्तर अशोक वानखेडे यांनी सांगितले.