आमदार निधीतून प्रत्येक आमदार मतदारसंघात आयोजित करणार फुटबॉल स्पर्धा

मुंबई | विधान परिषद सभापती ११ विरुध्द विधान सभा अध्यक्ष ११ अशी आमदार चषक फुटबॉल स्पर्धा गुरुवारी विधानभवन प्रांगणात आयोजित करण्यात आली होती. या चुरशीच्या लढतीत अध्यक्ष ११ यांची टीम जिंकली. त्याच पार्श्वभूमीवर हिवाळी अधिवेशनादरम्यान याच टीममध्ये क्रिकेट मॅच आणि महिला आमदारांसाठीही स्वतंत्र क्रिकेट मॅच होणार असल्याचे मुख्यमंत्री देवेंद्र फडणवीस यांनी जाहीर केले. येणाऱ्या काळात प्रत्येक आमदार आपल्या मतदारसंघात आमदार निधीतून फुटबॉल स्पर्धा आयोजित करणार आहे.

विशेष म्हणजे या फुटबॉल स्पर्धेची रंगतदार समालोचन (कॉमेंटरी) मुख्यमंत्री देवेंद्र फडणवीस आणि क्रीडा मंत्री विनोद तावडे यांनी केली. या स्पर्धेला विधान परिषदेचे सभापती रामराजे नाईक-निंबाळकर, उपसभापती माणिकराव ठाकरे, विधानसभा अध्यक्ष हरीभाऊ बागडे यांच्यासह मंत्रिमंडळातील मंत्री, राज्यमंत्री उपस्थित होते. आज झालेल्या या फुटबॉल स्पर्धेत विधानपरिषद आणि विधानसभा सदस्यांनी भाग घेत फुटबॉल स्पर्धेचा आनंद लूटला. विधानभवन प्रांगणात फुटबॉल स्पर्धेमुळे खेळाचे वातावरण निर्माण झाले होते.

जागतिक फुटबॉल महासंघाची (फिफा) 17 वर्षाखालील विश्वचषक स्पर्धा ऑक्टोबर महिन्यात भारतामध्ये होत आहे. विशेष म्हणजे संपूर्ण भारतीय उपखंडामध्ये होणारी ही पहिली फिफाची विश्वचषक स्पर्धा आहे. फुटबॉल विश्वचषक स्पर्धेच्या निमित्ताने संपूर्ण देशात क्रीडा संस्कृती रुजविण्याचे प्रयत्न प्रधानमंत्री नरेंद्र मोदी यांनी केले आहे. यासाठी राष्ट्रीय स्तरावर मिशन 11 मिलियन हा प्रकल्प हाती घेण्यात आला आहे. त्याच धर्तीवर महाराष्ट्रात मिशन 1 मिलियन हा फुटबॉल प्रकल्प हाती घेण्यात आला आहे. या मिशनच्या निमित्ताने शाळांमधून जवळपास 10 लाखांहून अधिक मुला-मुलींपर्यंत फुटबॉल आणि क्रीडा संस्कृती पोहोचविण्यात येणारे महाराष्ट्र हे पहिलेच राज्य ठरत असल्याचे तावडे यांनी यावेळी सांगितले.