आयपीएलच्या पार्श्‍वभूमीवर पंजाबमध्ये आयएसआयचे चार संशयित अटकेत
मोहाली । पंजाबमधील भारतीय गुप्तचर यंत्रणांनी पाकिस्तानची गुप्तचर संस्था आयएसआयच्या चार संशयितांना अटक केली. मोहालीमध्ये होणार्‍या आयपीएल सामन्यात खालिस्तानच्या मुद्द्यावरून राडा करण्याचा कट रचणार्‍या चार युवकांना ताब्यात घेण्यात आले. या तरुणांना आयएसआयच्या एका एजंटने सोशल मीडियाच्या माध्यमातून धार्मिक भावना भडकवण्यासाठी प्रशिक्षण दिले होते. बस आणि दारुचे अड्डे जाळून खालिस्तानचा जनमत संग्रह-2020 च्या मुद्द्याचा प्रचार करण्याची जबाबदारी या तरुणांवर देण्यात आली होती, अशी माहिती पोलिसांच्या प्रवक्त्यांनी दिली. या चार युवकांना शहीद भगत सिंह नगरमधून अटक करण्यात आली. ते एका दारुच्या भट्टीवर आग लावण्यासाठी निघाले होते.
त्यांच्याकडून दहा लीटर डिझेल आणि अन्य साहित्य जप्त करण्यात आले, असेही पोलिसांच्या प्रवक्त्याने सांगितले. दीप कौर उर्फ कुलवीर नावाच्या महिलेने फेसबुकच्या माध्यमातून कट्टरतावादाचे प्रशिक्षण दिल्याची कबुली या तरुणांनी प्राथमिक चौकशीत दिली. या महिलेने नंतर आपली ओळख फतेह सिंह नावाच्या आयएसआय एजंटशी करून दिल्याचेही या संशयितांनी सांगितले. फतेह सिंहने या तरुणांना दारूची दुकाने आणि बस पेटवून वातावरण गढूळ करण्याची जबाबदारी दिली होती. शिवाय विविध ठिकाणी रेफरेंडम-2020 चे पोस्टर लावण्यासाठीही सांगितले होते, अशी माहिती पोलिसांनी दिली. अटक केलेल्या युवकांची नावे मनवीर सिंह, जसप्रीत सिंह, सुखविंदर सिंह आणि रणधीर सिंह अशी सांगितली जात आहेत. हे सर्व तरुण शहीद भगत सिंह नगर जिल्ह्यातील खानखाना गावचे आहेत.