आवक घटल्याने काकडी, घेवडा महागला

पुणे । मागणीच्या तुलनेत आवक घटल्याने काकडी व घेवडा आदी फळभाज्यांच्या दरात वाढ झाली आहे. तर आवक वाढल्याने टोमॅटो, हिरवी मिरची आणि भूईमूग शेंगाचे दर 10 ते 15 टक्क्यांनी घटले आहेत. इतर फळभाज्यांची आवक जावक कायम असल्याने दर स्थिर आहेत. दरम्यान, बाजारात उन्हाळी भुईमुगाचा हंगाम सुरू झाला असल्याची माहिती व्यापारी विलास भुजबळ यांनी दिली.

रविवारी गुलटेकडी येथील श्री छत्रपती शिवाजी मार्केट यार्डात सुमारे 160 ते 165 ट्रक शेतमालाची आवक झाली. हिमालय प्रदेशमधून 2 ट्रक मटार, कर्नाटक आणि गुजरात येथून 4 ते 5 ट्रक कोबी, तामिळनाडू, आंध्रप्रदेश आणि गुजरात येथून 14-15 टेम्पो हिरवी मिरची, आंध्रप्रदेश आणि तामिळनाडू येथून 5 ते 6 टेम्पो शेवगा, कर्नाटकातून तोतापुरी कैरी 8 ते 10 टेम्पो, मध्यप्रदेश आणि गुजरातमधून लसणाची साडेचार ते 5 हजार गोणी इतकी आवक झाली. स्थानिक भागातून सातारी आले 1100 ते 1200 पोती, टॉमेटो साडेपाच ते 6 हजार पेटी, फ्लॉवर 18 ते 20 टेम्पो, कोबी 14 ते 15 टेम्पो, तांबडा भोपळा 8 ते 10 टेम्पो, गवार 8 ते 10 टेम्पो, भेंडी 10 ते 12 टेम्पो, ढोबळी मिरची 8 ते 10 टेम्पो, हिरवी मिरची 7 ते 8 टेम्पो, गावरान कैरी 14 ते 15, चिंच 15 ते 20 पोती, कांद्याची 125 ट्रक, आग्रा, इंदौर, नाशिक आणि तळेगाव येथून नवीन बटाट्याची 65 ट्रक, भुईमूग 150 पोती इतकी आवक झाली.

आंबा, कलिंगड, खरबूजची मागणी वाढली
वाढत्या उन्हामुळे मार्केटयार्डातील फळबाजारात आंबा, डाळींब, कलिंगड, खरबूज, चिक्कू आदी फळांना मागणी वाढली आहे. आवकेच्या तुलनेत मागणी जास्त असल्याने दरात 5 ते 10 टक्क्यांनी वाढ झाली आहे. बाजारात लिंबू विक्रेते, सरबत विक्रेते, गुर्‍हाळे यांच्याकडून लिंबांना मागणी होत आहे. मात्र, बाजारात दाखल होणाऱी लिंबे ही मोठ्या प्रमाणात लहान व कच्च्या स्वरुपात असल्याने त्यांना बाजारात उठाव नाही. परिणामी, त्याच्या दरातही मोठी घट झाली आहे. इतर फळांचे दर स्थिर असल्याची माहिती व्यापार्‍यांनी दिली. रविवारी येथील फळबाजारात अननस 7 ट्रक, मोसंबी 50 टन, संत्री 2 ते 3 टन, डाळिंब 35 ते 40 टन, पपई 2 ते 3 टेम्पोे, लिंबाची 5 ते 6 हजार गोणी, चिक्कू 2 हजार डाग, पेरु 100 क्रेटस्, कलिंगड 25 ते 30 टेम्पो, खरबुज 20 टेम्पो, आंबा 8 ते 10 हजार पेटी इतकी आवक झाल्याचे व्यापार्‍यांनी सांगितले.

फळांचे दर पुढीलप्रमाणे
लिंबे (प्रति गोणी) : 200-800, अननस (डझन) : 70-270, मोसंबी : (3 डझन) : 150-350, (4 डझन ) : 60-150, संत्रा : (3 डझन) 200-350, (4 डझन) : 50-180, डाळिंब (प्रति किलोस) : भगवा : 30-110, गणेश 5-25, आरक्ता 10-40, कलिंगड : 5-15, खरबुज : 10-20, पपई : 5-15, चिक्कू : 100-600, पेरू (20 किलो) : 400-600,
आंबा : लालबाग 20 – 40, बदाम 30-50, कर्नाटक : पायरी (2 डझन) 400-700, हापूस (4 डझन) 600 ते 1000, रत्नागिरी हापूस : तयार 4 ते 8 डझन, कच्चा 2 ते 3.5 हजार.

फळभाज्यांचे दहा किलोचे भाव
कांदा : 65-85, बटाटा : 140-170, लसूण : 100-300, आले : सातारी : 580-600, भेंडी : 150-250, गवार : 200-300, टोमॅटो : 40-50, दोडका : 200-250, हिरवी मिरची : 100-300, दुधी भोपळा : 50-100, चवळी : 150-200, काकडी : 100-200, कारली : हिरवी 200-250, पांढरी : 200-220, पापडी : 200-250, पडवळ : 170-180, फ्लॉवर : 30-60, कोबी : 30-60, वांगी : 100-200, डिंगरी : 150-200, नवलकोल : 80-100, ढोबळी मिरची : 150-250, तोंडली : कळी 200-250, जाड : 100-120, शेवगा : 200-250, गाजर : 60-100, वालवर : 200-250, बीट : 40-60, घेवडा : 500-600, कोहळा : 100-150, आर्वी : 200-250, घोसावळे : 140-150, ढेमसे : 150-200, भुईमूग : 300-350, पावटा : 500, मटार : परराज्य : 700-750, तांबडा भोपळा : 50-100, कैरी : तोतापुरी : 150-160, गावरान : 100-150, चिंच : (अखंड) : 300-320, फोडलेली : 600-650, सुरण : 230-240, मका कणीस : 50-100, नारळ (शेकडा) : 1000-1600.

पालेभाज्या कडाडल्या
मागणीच्या तुलनेत आवक घटल्याने कोथिंबीर, कांदापात, चाकवत, अंबाडी, पालक वगळता इतर पालेभाज्या 10 ते 20 टक्क्यांनी महागल्या आहेत. गेल्या आठवड्याच्या तुलनेत इतर पालेभाज्यांचे वाढलेले दर कायम असल्याने किरकोळ बाजारात पालेभाज्यांची चढ्या भावाने विक्री होत आहे. कोथिंबिरीच्या जुडीला घाऊक बाजारात 5 ते 15 रुपये मोजावे लागत आहेत. किरकोळबाजारात 15 ते 25 रुपये भावाने जुडीची विक्री होत असल्याची माहिती व्यापारी विलास भुजबळ यांनी दिली. रविवारी मार्केटयार्डातील तरकारी विभागात कोथिंबीरीची सुमारे दीड लाख तर मेथीची 40 हजार जुडींची आवक झाल्याचे सांगण्यात आले.

पालेभाज्यांचे भाव (शेकडा जुडी)
कोथिंबीर : 500-1500, मेथी : 500-1200, शेपू : 1000-1300, कांदापात : 500-800, चाकवत : 400-600, करडई : 500-600, पुदिना : 200-300, अंबाडी : 500-600, मुळे : 1000-1500, राजगिरा : 500-600, चुका : 800-1000, चवळई : 500-700,
पालक : 500-600.

फुलांचे दर स्थिर
लग्नसराईच्या थोड्या तारखा शिल्लक राहिल्याने मार्केटयार्डातील फुलबाजारात गुलाब, जर्बेरा, मोगरा, कार्नेशियन आदी शोभिवंत फुलांना मागणी कायम आहे. गेल्या आठवड्याच्या तुलनेत आवक जावक कायम असल्याने फुलांचे दर स्थिर आहेत. उन्हाचा कडाका वाढल्याने फुलांचा दर्जा व आकारावर परिणाम होऊन आकार लहान राहत असल्याची माहिती व्यापारी सागर भोसले यांनी दिली.

फुलांचे प्रति किलोचे दर
झेंडू : 20-60, गुलछडी : 80-120, बिजली : 30-60, कापरी : 30-60, ऑस्टर : 15-20, गुलाबगड्डी (गड्डीचे भाव) : 15-40, गुलछडी काडी : 20-60, डच गुलाब (20 नग) : 60-100, लिलिबंडल : 3-6, जर्बेरा : 60-100, कार्नेशियन : 120-200,
मोगरा : 200 – 400.

मासळीच्या दरातील तेजी कायम
देशाच्या पुर्व व पश्‍चिम किनारपट्टीवरून स्थानिक बाजारपेठांमध्ये मासळीची आवक घटली आहे. दरम्यान, मागणीच्या तुलनेत आवक कमी असल्याने मासळीच्या दरातील तेजी कायम आहे. तर, चिकनचे दर प्रतिकिलोमागे 10 रुपयांनी वधारले आहेत. इंग्लिश अंड्याच्या दरात शेकड्यामागे 40 ते 50 तर गावरान अंड्याच्या दरात 20 रुपयांनी वाढ झाली असून प्रतिनगाचे दर स्थिर असल्याची माहिती व्यापार्‍यांनी दिली. गणेश पेठेतील घाऊक बाजारात खोल समुद्रातील मासळीची सुमारे 8 ते 10 टन, खाडीच्या मासळीची सुमारे 300 किलो आणि नदीतील मासळीची सुमारे दिड ते 2 टना इतकी आवक झाली. तर, आंध्रप्रदेशातील रहु, कतला, सीलन आदी प्रकारच्या मासळीची सुमारे 10 ते 12 टन इतकी आवक झाली असल्याची माहिती मासळीचे व्यापारी ठाकूर परदेशी यांनी दिली.

मासळीचे दर पुढीलप्रमाणे (प्रतिकिलो)
पापलेट : कापरी : 1600-1700, मोठे : 1500-1600, मध्यम : 1200, लहान : 900, भिला : 700, हलवा : 700, सुरमई : 650-750, रावस लहान : 700, मोठा : 800, घोळ : 700, करली : 320, करंदी (सोललेली) : 320, भिंग : 400, पाला : 600-1200, वाम : 400-600, ओले बोंबील : 200, कोळंबी : लहान : 360, मोठी : 480, जंबोप्रॉन्स : 1500, किंगप्रॉन्स : 800, लॉबस्टर : 1500, मोरी : 280-360, मांदेली : 120, राणीमासा : 200, खेकडे : 240, चिंबोर्‍या : 400-480.
खाडीची मासळी : सौंदाळे : 240, खापी : 240, नगली : 200-400-480, तांबोशी : 440, पालू : 280, लेपा : 160-240, शेवटे : 240, बांगडा : 160-200, पेडवी : 80, बेळुंजी : 140, तिसर्‍या : 200, खुबे : 160, तारली : 120. नदीची मासळी : रहू : 240, कतला : 160, मरळ : 400, शिवडा : 240, चिलापी : 60, मांगूर : 140, खवली : 180, आम्ळी : 100, खेकडे : 160, वाम : 550. मटण : बोकडाचे : 460, बोल्हाईचे : 460, खिमा : 460, कलेजी : 480. चिकन : चिकन : 150, लेगपीस : 180, जिवंत कोंबडी : 120, बोनलेस : 250. अंडी : गावरान : शेकडा : 620, डझन : 84 प्रति नग : 7. इंग्लिश : शेकडा : 378 डझन : 48 प्रतिनग : 4.