आ.राम कदम यांना पप्पू म्हणत उडवली खिल्ली

 मुंबई: भाजपचे आमदार राम कदम यांना पप्पू म्हणत आणि त्यांच्या विरोधात बॅनर लावत महाराष्ट्र नवनिर्माण सेनेने त्यांची खिल्ली उडवली आहे. प्रजा फाऊंडेशनने काही दिवसांपूर्वीच मुंबईतील आमदारांच्या कामगिरीबाबत एक अहवाल प्रसिद्ध केला. या अहवालात भाजपाचे आमदार राम कदम यांचे स्थान ३२ वे म्हणजेच शेवटचे आहे.

आता राम कदम यांच्याबाबत ही माहिती समजल्यावर मनसे खिल्ली उडवणारच. कारण राम कदम यांनी मनसेला सोडचिठ्ठी देत भाजपात प्रवेश केला. राम कदम जेव्हा मनसेत होते तेव्हा ते मनसे अध्यक्ष राज ठाकरे यांचे निकटवर्तीय मानले जात. मात्र त्यांनी भाजपात प्रवेश केला. त्यानंतर त्यांच्या कामगिरीत त्यांना शेवटचे ठरवले गेल्याने मनसेने त्यांची खिल्ली उडवली.

या बॅनरमध्ये राम कदम यांच्या दहीहंडी उत्सवाचाही संदर्भ देण्यात आला आहे. पप्पू कान्ट डान्स साला| गोविंदा आला रे आला| असे म्हणत तुमचे अभिनंदन असे खिल्ली उडवणारे बॅनर आणि फ्लेक्स घाटकोपरमध्ये लावण्यात आले आहेत. राम कदम यांच्या घरासमोरही हे बॅनर लावून चेष्टा केली आहे .