इजिप्तमधील दहशतवादी हल्ल्यात 23 ठार, 25 जखमी

मिन्या (इजिप्त)। इजिप्तमध्ये कॉप्टिक ख्रिश्‍चन लोकांना घेऊन जाणार्‍या एका बसवर दहशतवादी हल्ला करण्यात आला आहे. यात तब्बल 23 लोकांचा मृत्यू झाला असून 25 जण गंभीर जखमी झाल्याची माहिती समजते आहे. दक्षिण काहिरापासून 250 कि.मी.वर असणार्‍या मिन्या प्रांतात हा दहशतवादी हल्ला करण्यात आला. कॉप्टिक ख्रिश्‍चन लोकांना घेऊन जाणार्‍या बसवर हा हल्ला झाला आहे. याआधी सुद्धा कॉप्टिक बसवर अशा प्रकारचे हल्ले करण्यात आले होते.

यामध्ये मृत झालेल्यात लहान मुलांचा समावेश मोठ्या प्रमाणात असल्याचे समोर आले आहे. ईसाइ (ख्रिस्ती) समाजावर झालेला हा या दोन महिन्यातील दुसरा मोठा हल्ला आहे. काहिरावरून 250 कि.मी. दक्षिण भागात अंबा शमुवेल मोनेस्ट्रीकडे जात असताना बंदूकधार्‍यांनी हा हल्ला केल्याचे गृह मंत्रालयाने सांगितले. मंत्रालयाने सांगितलेल्या माहितीनुसार या हल्ल्यात 26 जणांचा मृत्यू झाला आहे. अद्याप, या हल्ल्याची जबाबदारी कोणीही घेतलेली नाही. सुरक्षा दलांनी याचा तपास सुरू केला आहे.

प्रत्यक्षदर्शींनी सांगितल्यानुसार, जवानांच्या पोशाखात असलेल्या आठ ते दहा जणांनी चालू बसवर गोळीबार केला. यावेळी तिथे मृत्यूचे तांडव उभे राहिले होते. सगळीकडे कर्कश आवाज येत होता. इजिप्तमध्ये गेल्या महिन्यात झालेल्या हल्ल्याची जबाबदारी इसिसने घेतली होती. टंटामध्ये झालेल्या दहशतवादी हल्ल्यात 46 जणांचा मृत्यू झाला होता. हल्लेखोरांनी इजिप्तमधील लष्कराचे कपडे परिधान केले होते. अद्याप तरी या हल्ल्याची कोणत्याही दहशतवादी संघटनेनं जबाबदारी स्वीकारलेली नाही.