‘एनडीए’ परिसरात बिबट्याचा वावर; नागरिकांमध्ये भीती

पुणे : पुणे राष्ट्रीय संरक्षण प्रबोधिनी (एनडीए) आणि परिसरात गेल्या काही दिवसांपासून बिबट्याचा वावर आढळून आल्याने परिसरातील नागरिकांनी वन विभागाला माहिती दिली आहे. ‘एनडीए’ प्रशासनानेही तेथे वास्तव्याला असणार्‍या कॅडेट्स, शिक्षक आणि अधिकार्‍यांना सायंकाळनंतर काही ठिकाणी एकट्याने न फिरण्याच्या सूचना दिल्या आहेत. ‘एनडीए’च्या फिल्टरेशन प्लांट, त्रिशक्ती गेट, पाषाण गेट, लाँग रेंज, गोल्फ कोर्स या भागात बिबट्याचे दर्शन सातत्याने होत असल्याचे प्रशासनाने म्हटले आहे. त्यामुळे ‘एनडीए’मध्ये कोणताही अनुचित प्रकार घडू नये, यासाठी कॅडेट्स, शिक्षक आणि अधिकार्‍यांना सतर्कतेचा इशारा देण्यात आला आहे. अधिकारी आणि कर्मचार्‍यांनी त्यांच्या घरांच्या
आजूबाजूची पाहणी करण्यासोबतच तेथे रात्रीच्या वेळी पुरेशा प्रमाणात प्रकाशव्यवस्था करण्याची काळजी घेण्याबाबत सांगितले आहे. दरम्यान, काही अनुचित प्रकार घडल्यास त्याची माहिती तातडीने सुरक्षा यंत्रणेकडे द्यावी, अशी सूचनाही देण्यात आली आहे.

वनाधिकार्‍यांना निवेदन

एनडीए परिसरात राहणार्‍या नागरिकांनी शुक्रवारी वनाधिकार्‍यांना भेटून निवेदन दिले. नागरिकांनी बिबट्या दिसल्याचे सांगितले. रात्री उशिरा एकट्याने फिरू नका आणि पाळीव जनावरांना मोकळे सोडू नका, अशा सूचना आम्ही नागरिकांना दिल्या आहेत. या भागात वनक्षेत्र मोठे आहे. त्यामुळे बिबट्याचा वावर असू शकतो. पण, बिबट्याने अद्याप कोणत्याही प्राण्याची शिकार केलेली नाही, असे सहाय्यक वनसंरक्षक महेश भावसार यांनी स्पष्ट केले.