एमएमआरडीएने केले रिलायन्सच्या फायद्याचे काम

कॅगच्या अहवालात फायदा दिल्याचा ठपका

मुंबई :- भाजप सरकार रिलायन्सवर मेहेरबान असल्याची अनेक उदाहरणे जगजाहीर असताना आता महाराष्ट्रात देखील सरकारकडून रिलायन्सवर मेहेरबानी केल्याचे कॅगच्या अहवालात समोर आले आहे. बांद्रा-कुर्ला कॉम्पलेक्समधील रिलायन्स इंडस्ट्रीजला फायदा होईल, असे काम एमएमआरडीएकडून झाले असल्याचा ठपका कॅगच्या अहवालात ठेवण्यात आला आहे. रिलायन्सने नियमाचा भंग केल्यानंतर रिलायन्सकडून पैसे वसूल करणे अपेक्षित होते. मात्र, एमएमआरडीएने तसे न करता रिलायन्सला भोगवाटा प्रमाणपत्र देऊन त्यांच्याकडे असलेली ३१२ कोटी आणि व्याजाची १५४ कोटी भरलेले नाहीत. तर दुसरीकडे इतर कंपन्याकडून मात्र, हे पैसे वसूल करण्यात आले असल्याचे, कॅगने सादर केलेल्या अहवालात स्पष्ट केले आहे.

रिलायंन्स इंड्रस्ट्रीजला फायदा करून दिल्या संदर्भात एमएमआरडीए कडे विचारणा केली असता नोव्हेंबर २०१७ पर्यंत एमएमआरडीए कडून याचा कोणतीही माहिती दिली नसल्याचा ठपका भारताचे नियंत्रक व महालेखापरिक्षक यांनी ठेवला आहे. भारताचे नियंत्रक व महालेखापरिक्षक यांचा सन २०१६-२०१७ या आर्थिक वर्षाचा अहवाल सभागृहाच्या समोर सादर करण्यात आला आहे. कॅगच्या या अहवालात एमएमआरडीएवर वसूली आणि भोगवाटा प्रमाणपत्रे देतांना पक्षपाती पण केल्याचा ठपका ठेवला आहे. रिलायन्स इंडस्ट्रीला फायदा होईल असे निर्णय घेतले आणि तशाच दूसऱ्या प्रकरणामध्ये मात्र जेट एअरवेज आणि ऑईल अॅन्ड नॅचरल गॅस कमीशन यासह इतर विविध राष्ट्रीयकृत बॅंका/ शासकीय संस्था यांच्याकडून मात्र पैसे वसूल करण्यात आले आहे.