एसी लोकलच्या सुरक्षेचा मुख्य सुरक्षा आयुक्तांनी घेतला आढावा

मुंबई । मुंबई लोकलच्या शिरपेचात मनाचा तुरा रोवायला येणार्‍या एसी लोकलची सर्वांना प्रतीक्षा आहे. पश्‍चिम रेल्वेच्या सेवेत जानेवारीपासून दाखल होणार्‍या पहिल्यावहिल्या वातानुकूलित लोकलमध्ये प्रवाशांच्या सुरक्षेवर भर देण्यात येत आहे. 12 डब्यांच्या या लोकलमध्ये डब्याखाली जोडलेल्या आपत्कालीन पायर्‍यांची रुंदी वाढविण्याची महत्त्वाची सूचना मुख्य सुरक्षा आयुक्त (सीआरएस) यांनी केली आहे. मुख्य सुरक्षा आयुक्तांनी केलेल्या पाहणीनंतर या पायर्‍यांची रुंदी वाढविण्याचा गांभीर्याने विचार होत आहे.

ही एसी लोकल चालविली जाण्यापूर्वी सुरक्षेच्या सर्व उपायांची खातरजमा केली जात आहे. प्रत्यक्ष चाचणीपूर्वी कार्यशाळेत अजूनही सुरक्षा चाचण्या सुरू आहेत. पश्‍चिम रेल्वे विभागाचे मुख्य सुरक्षा आयुक्त सुशील चंद्रा यांनी नुकतीच एसी लोकलची पाहणी केली. त्यावेळी आपत्कालीन पायर्‍यांची रुंदी 63 सेंमी. असणे अपेक्षित असल्याची गरज त्यांच्या लक्षात आली. याशिवाय त्यांनी स्वयंचलित पद्धतीने बंद होणारे दरवाजे, डब्यांमधील एसीचा गारवा आदी सर्व गोष्टी तपासल्या आहेत.