ओला कचर्‍यासाठी महापालिकेची विशेष मोहीम
माहितीची सूची घनकचरा विभाग तयार करणार
पुणे : महानगरपालिकेच्या घनकचरा व्यवस्थापन विभागातील विविध उपाय-योजनांच्या अंतर्गत घरे, सोसायट्या, शाळा, हॉटेल्स तसेच विविध संस्था, कंपन्यांच्या हद्दीतच ओला कचरा कसा जिरविला जावा, यासाठी महापालिकेकडून विशेष मोहीम हाती घेण्यात येणार आहे. त्या अंतर्गत अशा प्रकारचे प्रकल्प उभारणार्‍या सोसायट्या व्यक्ती तसेच संस्थाच्या माहितीची सूची घनकचरा व्यवस्थापन विभाग तयार करणार आहे.
ओला कचरा हद्दीतच जिरविण्याची अंमलबजावणी अधिक प्रभावी करण्याचा महानगरपालिकेकडून उपाययोजना केल्या जात आहेत. सोसायट्या अथवा संस्थांना हे काम करण्यासाठी मार्गदर्शन तसेच आपल्या गरजेनुसार, नेमकी कशा प्रकारची यंत्रणा याची माहिती नसते. त्यामुळे या कचरा व्यवस्थापनाकडे सोसायट्या दुर्लक्ष करतात. ही बाब लक्षात घेऊन 1 किलो ते 1 हजार किलोदरम्यान ओला कचर्‍यावर प्रक्रिया करणार्‍या सोसायट्या, व्यक्ती, संस्था, कंपन्यांची सूची करण्याचे काम घनकचरा व्यवस्थापन विभागाने हाती घेतले आहे. त्या अंतर्गत महापालिकेकडे आतापर्यंत 25 जणांनी नोंदणी केले आहे. अशा संस्था अथवा व्यक्तींनी घनकचरा व्यवस्थापन विभागाशी 2 मार्चपूर्वी संपर्क साधून नोंदणी करावी, असे आवाहन सहआयुक्त ज्ञानेश्वर मोळक यांनी केले आहे.
प्रदर्शन भरविले जाणार
ही सूची तयार केल्यानंतर प्रत्येक क्षेत्रीय कार्यालयाच्या स्तरावर महापालिकेकडून प्रदर्शन भरविले जाणार आहे. या प्रदर्शनात हे प्रकल्प करणारे आणि ज्या सोसायट्या-संस्थांना कचरा व्यवस्थापनाची माहिती हवी आहे, अशा व्यक्तींनाही निमंत्रित केले जाणार असून त्यांच्या माध्यमातून नागरिकांना माहिती दिली जाणार आहे.