ओला व सुका कचर्‍याचे वर्गीकरण करणे ही काळाची गरज : महापौर
कोथरूड : जैववैद्यकीय कचर्‍यापाठोपाठ ई कचरा व प्लॅस्टिक कचरा ही प्रभागातच जिरविण्याच्या दृष्टीने जे उपक्रम सुरू केले प्रभाग क्रमांक 13मध्ये सुरू झाले असून ते स्तुत्य आहेत. शहरातील सर्वच प्रभागात असे उपक्रम राबविले पाहिजे. कचर्‍याचे वर्गीकरण आणि विघटन हा जिव्हाळ्याचा विषय असून जेथे कचरा निर्माण होतो तेथेच त्याचे वर्गीकरण होणे गरजेचे आहे, असे महापौर मुक्ता टिळक यांनी सांगितले.
प्रभाग 13च्या नगरसेविका मंजुश्री खर्डेकर यांनी श्री रिसायकलर्सच्या मदतीने प्रभागातील ई-कचरा तर मे क्लीन गारबेज मॅनेजमेन्ट संस्थेच्या सहकार्याने प्लॅस्टिक कचरा संकलन व जनजागृती मोहिमेच्या उद्घाटनप्रसंगी त्या बोलत होत्या. आमदार मेधा कुलकर्णी, सुशील मेंगडे, माधुरी सहस्रबुद्धे, दीपक पोटे, जयंत भावे, गणेश सोनुने, रवींद्र धारिया, संदीप खर्डेकर, राघवेंद्र पुरोहित, सुरेश मालशे, विनीत गोखले आदी उपस्थित होते.
त्याच भागात कचरा जिरवावा
टिळक म्हणाल्या, या सेवकांकडे मानवी दृष्टिकोनातून बघितले पाहिजे, त्यांची कचरा गोळा व वर्गीकरण करतानाची अवस्था आपण बघितली तर ओला व सुका कचरा वेगळा करून देणे तसेच प्रत्येक भागातील कचरा त्याच भागात जिरविण्यासाठी प्रयत्न करणे ही काळाची गरज आहे.
नागरिकांच्या अनुषंगाने विचार व्हावा
आमदार कुलकर्णी यांनी प्लॉस्टिक कचर्‍याची समस्या मोठी असून यावर अधिक संशोधन होणे गरजेचे आहे, असे नमूद करून सूस रोड येथील कचरा विघटन प्रकल्पाचे उदाहरण देऊन त्या म्हणाल्या तेथे घाण वास आणि रोगराईचा प्रसार होत असून प्रकल्प उभारताना त्याचा नागरिकांच्या अनुषंगाने विचार होणे गरजेचे आहे. खर्डेकर म्हणाल्या, ई कचरा देणार्‍या सोसायट्यांना श्री रिसायकलर्सचे विनीत बियाणी हे त्या वजनाइतक्या वजनाचे पर्यावरणपूरक एलइडी बल्ब आणि ट्युबलाइट देणार आहेत, तर मे क्लीन गारबेज मॅनेजमेन्टचे ललित राठी हमी भावाने प्लॅस्टिक कचरा विकत घेणार असून यामुळे नागरिक कचर्‍याचे वर्गीकरण करून ते देण्यासाठी प्रयत्नशील राहतील असे सर्वेमधे दिसून आले आहे. यावेळी महापौर व आमदार यांना पर्यावरणपूरक बल्ब, कचर्‍यापासून बनविलेल्या कुंड्या,आयुर्वेदीक रोप व पुस्तके देऊन सन्मानित करण्यात आले.पाहुण्यांचे सत्कार विनोद चव्हाण,रमेश चव्हाण,गणेश चव्हाण,सौरभ अथनीकर यांच्या हस्ते करण्यात आले. हॅपी कॉलनी परिसरातील नागरिक यावेळी मोठ्या संख्येने उपस्थित होते.