कर्नल पुरोहित यांच्यावरील आरोप निश्चित स्थगितीची मागणी फेटाळली

नवी दिल्ली-२००८ मधील मालेगाव बॉम्बस्फोटातील आरोपी कर्नल श्रीकांत पुरोहितवर आरोप निश्चित करण्याला स्थगिती देण्याची मागणी सुप्रीम कोर्टाने आज मंगळवारी फेटाळली. न्या.रंजन गोगोई यांच्या अध्यक्षतेखालील खंडपीठाने मालेगाव स्फोट प्रकरणाच्या एसआयटी चौकशीची मागणी करणाऱ्या याचिकेवर सुनावणी करण्यासच नकार दिला. या बाबतचा अर्ज त्यांनी सत्र न्यायालयातच दाखल करावा असे कोर्टाने म्हटले आहे.

मुंबई उच्च न्यायालयाने कर्नल पुरोहितसह इतरांची याचिका फेटाळून लावली होती. पुरोहितने कनिष्ठ कोर्टाकडून आरोप निश्चिती करण्याला स्थगिती देण्याची मागणी होयकोर्टाकडे केली होती. त्याचबरोबर हायकोर्टाने म्हटले होते की, बेकायदा कारयावा प्रतिबंध कायद्यानुसार (यूएपीए) आरोपांवर ट्रायल कोर्टाकडूनच निर्णय दिला जाईल. कर्नल श्रीकांत पुरोहितने याचिकेमध्ये आपल्यावर लावण्यात आलेल्या बेकायदा कारवाया प्रतिबंध कायद्याला आव्हान दिले होते.

२००८मध्ये झालेल्या मालेगाव बॉम्बस्फोट प्रकरणी कर्नल पुरोहित मुख्य आरोपी असून त्यांच्यावरील मोक्का हटवण्यात आल्याने तो सध्या जामीनावर तुरुंगातून बाहेर आहे. दरम्यान, या प्रकरणी दहशतवादविरोधी पथकाकडून (एटीएस) आपले अपहरण आणि छळ करण्यात आल्याचा आरोप पुरोहितने केला होता. तसेच आपल्याला यात अडकवण्याचा प्रयत्न करणाऱ्यांची विशेष तपास पथक नेमून चौकशी करण्यात यावी या मागणीसाठी त्यांनी सुप्रीम कोर्टात याचिका दाखल केली होती.

या याचिकेवर सुनावणी करणाऱ्या खंडपीठातून न्या. यू. यू.लळित यांनी अचानक स्वतःला वगळण्याचा निर्णय घेतला होता. त्यानंतर आज न्या. रंजन गोगोई यांच्या अध्यक्षतेखालील खंडपीठासमोर सुनावणी झाली.