कर भरणा विभाग राहणार सुट्टीच्या दिवशी सुरु

पिंपरी-चिंचवड :- पिंपरी-चिंचवड महापालिकेची 16 कर संकलन विभागीय कार्यालये जून महिन्यात साप्ताहिक आणि सार्वजनिक सुट्टीच्या दिवशीही सुरु ठेवली जाणार आहेत. त्यामुळे कराचा भरणा करण्यासाठी कर विभागीय कार्यालये सुट्टीच्या दिवशी सकाळी नऊ ते साडेतीन या वेळेत खुली राहणार आहे. मिळकतधारकांनी थकबाकीसह 30 जून 2018 पर्यंत कराचा भरणा करुन सवलत योजनेचा लाभ घेण्याचे आवाहन, अतिरिक्त आयुक्त दिलीप गावडे यांनी केले आहे.

आगाऊ भरणा-या मिळकतधारकांना करात सवलत
पिंपरी-चिंचवड शहरात सव्वा चार लाखांच्या आसपास मिळकती असून या मिळकतींना महापालिकेतर्फे करआकारणी केली जाते. थकबाकीसह दोन्ही सहामाहीच्या संपूर्ण बिलांची रक्कम 30 जून 2018 पर्यंत आगाऊ भरणा-या मिळकतधारकांना सामान्य करात सवलत देण्यात आली आहे. यामध्ये माजी सैनिक व स्वातंत्र्यसैनिक किंवा त्यांच्या पत्नी राहत असलेल्या मिळकतीस 50 टक्के, महिलांच्या नावे असलेल्या निवासी घरास 50 टक्के, 40 टक्के किंवा त्यापेक्षा जास्त अपंगत्व असणा-या अंध, अपंग, कर्णबधिर व मूकबधिर यांच्या नावावर असणा-या मिळकतीस 50 टक्के, ग्रीन बिल्डिंग रेटिंग सिस्टिम राबविणा-या मिळकतीस 5 ते 15 टक्के, स्वतंत्र नोंद असलेल्या निवासी मिळकतीस 10 टक्के, तर बिगरनिवासी, मिश्र, औद्योगिक, मोकळ्या जमिनी यासाठी 5 टक्के सामान्यकरात सवलत दिली आहे.

डिजिटल व्यवहारांना चालना मिळावी यासाठी 30 जून 2018 अखेर मिळकत कराचा ऑनलाईन भरणा केल्यास चालू वर्षाचे मागणीतील सामान्य करात 5% सवलत (अनुक्रमांक 01 ते 05 सवलत योजनांकरिता) व त्यापुढे 31 मार्च 2019 अखेर मिळकत कराचा ऑनलाईन भरणा केल्यास चालू वर्षाचे मागणीतील सामान्य करात 2% सवलत देण्यात येणार आहे.