कलेकडे व्यवसाय म्हणून न पाहता आनंद म्हणून पाहावे

तबलावादक पं. रामदास पळसुले यांचे प्रतिपादन

निगडी : लहानपणी घेतलेले चांगले अनुभव हे मोठेपणीच्या उज्वल स्वप्नांचे बीज रुजवतात. कलेकडे व्यवसाय म्हणून बघण्यापेक्षा आनंद, साधना म्हणून बघितले तरच त्या कलेचा परमोच्च आनंद घेता येतो. अशी दृष्टी देण्यासाठी तसेच गुरु मिळण्याचे भाग्य पाहिजे. उत्तम गुरु लाभले तरी त्याचे सोने करण्यासाठी अथक प्रयत्न, रियाज करण्याचीही तयारी हवी. अशी संधी जर शालेय जीवनात मिळाली तर त्याचा जरुर लाभ घ्या. सदैव कष्ट घेण्याची तयारी, गुरुंवर श्रद्धा ठेवली तर यश नक्की मिळते, असे प्रतिपादन तबलावादक पं. रामदास पळसुले यांनी केले. ज्ञान प्रबोधिनी नवनगर विद्यालयाच्यावतीने संगीत संमेलनाचे आयोजन करण्यात आले आहे. या संमेलनाच्या अध्यक्षीय बीजभाषणात ते बोलत होते.

बुधवार व गुरुवार रोजी होणार्‍या संगीत संमेलनाच्या उदघाटनप्रसंगी उपाध्यक्ष समीर दुबळे, ज्ञानप्रबोधिनीचे संचालक गिरीश बापट, केंद्रप्रमुख वामन अभ्यंकर, केंद्र उपप्रमुख मनोज देवळेकर, केंद्र व्यवस्थापक यशवंत लिमये, मुख्याध्यापिका प्रज्ञा पाटील, अलका शाळू, नचिकेत देव, शीतल कापशीकर, किशोर जाधव आदी उपस्थित होते. संमेलनाची सुरुवात माऊली उद्यानापासून निघालेल्या संगीत दिंडीने झाली. देवी सरस्वती, ग्रंथ संगीत रत्नाकर व विविध वाद्ये यांचे पूजन करण्यात आले. यात पारंपरिक वेशभूषा केलेले विद्यार्थी सहभागी झाले होते. कार्यक्रमाची सुरुवात नचिकेत देव यांनी सादर केलेल्या गणेशवंदनेने झाली.

संगितातून अभिव्यक्ती विकास
गिरीश बापट म्हणाले की, संगीत हे फक्त कला माध्यम नसून यातून संपूर्ण अभिव्यक्ती विकास साधतो. या दोन दिवसांच्या संमेलनातून भावी सांगितिक वाटचालीची दिशा प्रत्येकाला मिळेल. उत्तम कलाकार होण्याबरोबरच आस्वाद घेणारे रसिकही यातून तयार होतील. अशी आशा त्यांनी व्यक्त केली. मनोज देवळेकर यांनी प्रास्ताविकात संगीत संमेलन आयोजित करण्यामागील भूमिका स्पष्ट करताना म्हणाले की, संगीत ही नुसती कला नसून ते एक शास्त्र आहे. म्हणूनच त्याचा विशेष अभ्यास विद्यार्थी, शिक्षक आणि पालक यांनी मिळून करण्याच्या उद्देशाने या संगीत संमेलनाचे आयोजन करण्यात आले आहे.

कीर्तनाचे प्रात्यक्षिक
संमेलनाचे द्वितीय सत्र संगीताचे सादरीकरण या विषयावर आयोजित करण्यात आले. दुस-या सत्राच्या सुरुवातीला ज्येष्ठ कीर्तनकार डॉ. चारुदत्तबुवा आफळे यांनी छोटेसे कीर्तनाचे प्रात्यक्षिक सादर केले. आदर्श कीर्तनकार होण्यासाठी लागणारे गुण त्यांनी यावेळी विषद केले. यात त्यांना संवादिनीवर रेशीम खेडकर तर तबला मिलिंद तायवडे यांनी साथ दिली. त्यानतर या विषयाची अधिक माहिती परिसंवाद व प्रात्यक्षिक स्वरुपात देण्यात आली. शास्त्रीय संगीताविषयी डॉ. पौर्णिमा धुमाळे यांनी यमन रागातील ‘दर्शन देवो मज शंकर महादेव’ ही बंदिश व एक सुंदर तराना याचे सादरीकरण करत त्याविषयी सविस्तर माहिती दिली. कथक नृत्याविषयी विशेष माहिती पं. नंदकिशोर कपोते यांनी दिली.

संवादिनीची ओळख
संवादिनीची ओळख पं. प्रमोद मराठे यांनी अतिशय सहज आणि ओघवत्या माहितीद्वारे करुन दिली. यात हे एकच वाद्य वेगवेगळ्या ठिकाणी वेगवेगळी भूमिका बजावत असते हे अनुभवातून सांगण्यासाठी नाट्यसंगीत, ठुमरी, भैरवी झाला असे विविध प्रकार प्रत्यक्ष वाजवून दाखवले. उदघाटन समारंभाचे सूत्रसंचालन आदित्य शिंदे यांनी केले.