काँग्रेस आणि राष्ट्रवादी एकाच घरातील गोतावळा

खासदार सुप्रिया सुळे यांचे प्रतिपादन : सोनिया गांधी करंडक टी-20 क्रिकेट स्पर्धेचे उद्घाटन

पुणे : राजकारण, समाजकारण किंवा क्रिकेट असो प्रत्येक ठिकाणी टीमवर्क महत्त्वाचे आहे. स्वयंपाकघर जरी वेगळे असले, तरी काँग्रेस-राष्ट्रवादी काँग्रेस एकाच घरातील दोन मुले आहेत. कधीतरी भांड्याला भांडे लागते, पण प्रेम कमी झालेले नाही. दोघांचा ओरिजनल डीएनए तोच आहे. अजित पवार आणि मोहन जोशी हे दोन्ही दादा राज्यात व प्रशासनात उत्तम काम करीत आहेत. काँग्रेस व राष्ट्रवादी हे केवळ पक्ष नसून हा गोतावळा आहे, असे प्रतिपादन खासदार सुप्रिया सुळे यांनी केले.

काँग्रेसच्या नेत्या सोनिया गांधी यांच्या वाढदिवसानिमित्त सेवा, कर्तव्य, त्याग सप्ताहाचे आयोजन करण्यात आले. महाविद्यालयीन युवतींना प्रोत्साहन देण्याकरीता या सप्ताहात 19 वर्षाखालील मुलींसाठी सोनिया गांधी करंडक टी 20 क्रिकेट स्पर्धा आयोजित करण्यात आली आहे. या स्पर्धेचे उद्घाटन स्वारगेट येथील पंडित जवाहरलाल नेहरु स्टेडियम येथे खासदार सुप्रिया सुळे यांच्या हस्ते झाले. त्यावेळी त्या बोलत होत्या.

क्रिकेटमध्ये देशात ऐक्य निर्माण करण्याची ताकद

क्रिकेट हा देशाला व देशवासीयांना एकत्र आणणारा खेळ आहे. देशामधील सर्वाधिक लोकप्रिय आणि काही क्षणात भारतीयांमध्ये ऐक्य निर्माण करण्याची ताकद या खेळामध्ये आहे. त्यामुळे सप्ताहाच्या माध्यमातून युवतींमध्ये हा खेळ रुजविण्याचा प्रयत्न कौतुकास्पद असल्याचे सुप्रिया सुळे यांनी पुढे बोलताना सांगितले. यावेळी अखिल भारतीय काँग्रेस कमिटीच्या सेक्रेटरी सोनल पटेल, माजी आमदार मोहन जोशी, माजी महापौर कमल व्यवहारे, कैलास कदम, नगरसेवक अजित दरेकर, वीरेंद्र किराड, काका चव्हाण, मुकारी अलगुडे, रुपाली चाकणकर, विकास टिंगरे, विवेक भरगुडे आदी उपस्थित होते.

सुळे यांनी केली शानदार बॅटिंग

क्रिकेट स्पर्धेच्या उद्घाटनप्रसंगी आपल्या भाषणातून फटकेबाजी करणार्‍या खा. सुप्रिया सुळे यांनी क्रिकेटच्या पिचवर देखील जोरदार बॅटिंग केली. खेळपट्टीचे पूजन झाल्यानंतर त्यांनी सोनल पटेल यांना बॉलिंग केली आणि नंतर स्वत: बॅट हातात घेऊन जोरदार फटकेबाजी करीत महिला खेळाडूंना प्रोत्साहन दिले. यावेळी सोनल पटेल यांनी बॉलिंग केली, तर मोहन जोशी यांनी विकेट किपिंग करीत युवा खेळाडूंना प्रोत्साहीत केले.

युवतींना क्रिडा क्षेत्रात प्रोत्साहन देण्याकरीता स्पर्धेचे आयोजन

सोनिया गांधी या शक्तीचे प्रतिक आहेत. त्यांच्या वाढदिवसानिमित्त आयोजित सेवा, कर्तव्य, त्याग सप्ताहातील सर्व उपक्रम अत्यंत स्तुत्य आहेत. क्रिडा स्पर्धेसारख्या उपक्रमांतून प्रेरणा घेऊन आपण सर्वांनी जोमाने पुढे काम करुया, असे सोनल पटेल यांनी सांगितले. मोहन जोशी म्हणाले, काँग्रेस व राष्ट्रवादीने एकत्रित येऊन जातियवादी पक्षांना शक्तीने हरविणे, हा उद्देश आपण डोळ्यासमोर ठेवायला हवा, असे मोहन जोशी यांनी सांगितले. युवतींना क्रिडा क्षेत्रात प्रोत्साहन देण्याकरीता अशा प्रकारच्या स्पर्धा पुण्यामध्ये प्रथमच आयोजित करण्यात आल्या होत्या. स्पर्धेमध्ये आठ संघ सहभागी होणार असून दररोज दोन सामने होणार आहेत. विजेत्या व उपविजेत्या संघाला करंडक व सन्मानपत्र प्रदान करण्यात येणार आहे. तसेच स्पर्धेतील सर्वोकृष्ट खेळाडू, सर्वोकृष्ट गोलंदाज, सर्वोकृष्ट फलंदाज अशी वैयक्तिक पारितोषिके देण्यात येणार आहेत. स्पर्धेत सहभागी प्रत्येक संघाला प्रमाणपत्र देण्यात येईल, असेही त्यांनी सांगितले. भोला वांजळे यांनी कार्यक्रांचे सूत्रसंचालन केले, तर नीता परदेशी यांनी आभार मानले.