कात्रज उद्यानातील चंदनाच्या झाडांची चोरी
चोरटे सीसीटीव्ही कॅमेर्‍यात कैद; सुरक्षाभिंतीवरून आत प्रवेश
पुणे : कात्रज येथील राजीव गांधी प्राणी संग्रहालयाच्या आवारातील चंदनाची दोन झाडे चोरट्यांनी कापून नेल्याचा प्रकार सोमवारी उघडकीस आला. या प्रकरणी भारती विद्यापीठ पोलिस ठाण्यात गुन्हा दाखल करण्यात आला आहे. प्राणिसंग्रहालयाच्या आवारात घुसलेले तीन चोरटे सीसीटीव्ही कॅमेर्‍यात कैद झाले आहेत; पण त्यांनी चेहर्‍याला रुमाल बांधला आहे. त्यामुळे त्यांचे चेहरे स्पष्ट दिसत नाहीत. या सीसीटीव्हीवरूनच भारती विद्यापीठ पोलिसांनी आरोपींचा माग सुरू केला
आहे.
याबाबत प्राणिसंग्रहालयातील कर्मचारी प्रदीप बुदगुडे (46) यांनी तक्रार दिली आहे. त्यानुसार अज्ञात चोरट्यांविरोधात गुन्हा दाखल झाला आहे. रविवारी रात्रीच्या सुमारास राजीव गांधी प्राणिसंग्रहालयाच्या सुरक्षाभिंतीवरून उडी मारून चोरटे आत शिरले. चोरट्यांनी लांडगा व काळवीटाच्या खंदकातील दोन झाडे कापून नेली. सोमवारी सकाळी हा प्रकार उघडकीस आला. यापूर्वीही प्राणिसंग्रहालयाच्या आवारातून चंदनाची झाडे कापून नेल्याच्या घटना घडल्या आहेत. तीन वर्षांपूर्वी दुर्मीळ असे श्रृंगी जातीचे घुबडही चोरण्यात आले होते. प्राणिसंग्रहालयाच्या मुख्य प्रवेशद्वाराच्या परिसरात सीसीटीव्ही कॅमेरे आहेत. महापालिकेचे सुरक्षारक्षकही रात्री गस्त घालत असतात. मात्र, त्यांची नजर चुकवून चोरटे आत शिरले आणि त्यांनी चंदनाची झाडे कापून सुमारे 15 हजार किमतीचे चंदन चोरून नेले. या प्रकरणी सहायक पोलिस निरीक्षक चंद्रकांत सूर्यवंशी तपास करत आहेत.