कुर्‍हा-वढोदा इस्लामपूर उपसा सिंचनच्या तृतीय योजनेस सुधारीत प्रशासकीय मान्यता

मुक्ताईनगर : कुर्‍हा-वढोदा ईस्लामपूर सिंचन योजनेच्या (2226.53 कोटी रुपयांच्या) तृतीय सुधारीत मान्यता मंगळवार, 13 डिसेंबर 2022 रोजी पार पडलेल्या मंत्री मंडळांच्या बैठकीत प्रशासकीय मान्यता दिली आहे. या प्रलंबित योजनेस तृतीय प्रशासकीय मान्यता देण्यात आल्याने तसेच भरीव निधीची तरतूद करून देण्याचे आश्वासन मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी दिल्याने त्यांचा आमदार चंद्रकांत पाटील व जळगाव जामोद मतदार संघाचे आमदार संजय कुटे यांनी सत्कार करीत आभार मानले. यावेळी ग्रामाविकास मंत्री गिरीश महाजन, जळगाव जिल्ह्याचे पालकमंत्री गुलाबराव पाटील आदींसह इतर मान्यवर उपस्थित होते. दरम्यान, मंगळवारी मंत्री मंडळ बैठकीत सुधारीत प्रशासकीय मान्यता मिळाली असून येत्या आठ दिवसात यासंदर्भात शासन निर्णय जाहीर करण्यात येईल, अशी माहिती आमदर चंद्रकांत पाटील यांनी दिली.

धरणात सोडण्यात येणार पाणी
कुर्‍हा-वढोदा ईस्लामपूर सिंचन योजना प्रकल्पांतर्गत जळगाव जिल्ह्याच्या मुक्ताईनगर तालुक्यातील जिगांव धरणाच्या खालच्या बाजूस दोन किलोमीटर अंतरावर रीगाव गावाजवळ पूर्णा नदीचे 100.928 द.ल.घ.मी. पाणी पावसाळ्यात तीन टप्प्यत उचलून या प्रकल्पांतर्गत बांधण्यात येणार्‍या ईस्लामपूर धरणामध्ये सोडण्याचे प्रस्तावित आहे. बंदिस्त पाईप लाईनद्वारे 25 हजार 898 हेक्टर सिंचन क्षेत्र निर्माण करणे प्रस्तावित आहे. या प्रकल्पाद्वारे जळगांव जिल्ह्यातील मुक्ताईनगर व बुलढाणा जिल्हयातील जळगाव जामोद व संग्रामपूर अशा तीन तालुक्यातील अनुक्रमे आठ हजार 249 हे 10 हजार 122 हेक्टर. आणि सात हजार 527 हेक्टर क्षेत्रास सिंचनाचा लाभ होणार आहे.

तृतीय सुधारीत प्रस्तावास मान्यता
प्रकल्पास तापी पाटबंधारे विकास महामंडळाने 1997-98 दरसूचीवर आधारीत रुपये 155.95 कोटी इतक्या किंमतीस मूळ प्रशासकीय मान्यता प्रदान केली होती. तदनंतर महामंडळाने 1999-2000 च्या दरसूचीवर आधारीत रुपये 207.08 कोटी इतक्या किंमतीस नव्याने प्रशासकीय मान्यता प्रदान केली होती. त्यानंतर शासनाने 2006-2007 च्या दरसूचीवर आधारीत रुपये 503.64 कोटी इतक्या किंमतीस द्वितीय प्रशासकीय मान्यता प्रदान केली होती . त्यानंतर शासनाने सन 2008-2009 च्या दरसूचीवर आधारीत रुपये 842.40 कोटी इतक्या किंमतीस द्वितीय प्रशासकीय मान्यता प्रदान केलेली होती. तथापी इतर कारणांमुळे झालेली वाढ तसेच अनुषंगिक खर्चामुळे (इटीपी व इतर) प्रकल्प किंमतीत वाढ झाली. त्यामुळे तापी पाटबंधारे विकास महामंडळाने प्रकल्पाचा तृतीय सुधारित प्रशासकीय मान्यता प्रस्ताव शासनास मंजूरीस्तव सादर केला होता. त्यानुसार सदर प्रकल्पास रु.2226.53 कोटी रक्कमेस तृतीय सुधारीत प्रशासकीय मांन्यता देण्याचा प्रस्ताव मंत्री मंडळाने घेतला आहे.

असा आहे शासन निर्णय
कुर्‍हा-वढोदा इस्लामपूर उपसा सिंचन योजना, ता. मुक्ताईनगर, जि.जळगाव, या प्रकल्पाचस जलसंपदा विभाग सन 2017-18 ची दरसूची व सार्वजनिक बांधकाम विभाग यांची 2018-19 ची दरसूची तसेच म.जि. यांचे सन 2018-19 च्या दरसूचीवर आधारीत रुपये 2226.53 कोटी (रुपये दोन हजार दोनशे सर्व्वीस कोटी ) (प्रत्यक्ष कामासाठी रुपये 2093.40 कोटी रुपये दोन हजार त्र्याण्णव कोटी चाळीस लक्ष) व अनुषंगीक खर्च रुपये 133.13 कोटी (रुपये एकशे तेहतीस कोटी तेरा लक्ष) इतक्या किंमतीस तृतीय सुधारित प्रशासकीय मान्यता प्रदान करण्यात येत आहे, असा शासन निर्णय येत्या आठ दिवसात जाहीर होणार आहे.

योजनेच्या सुधारीत मान्यतेसाठी खासदार रक्षा खडसे यांच्या प्रयत्नांना यश
मुक्ताईनगर : एकीकडे कुर्‍हा-वढोदा इस्लामपूर उपसा सिंचन योजनेच्या सुधारीत प्रस्तावाला मान्यता मिळाली असताना ही मान्यता खासदार रक्षा खडसे यांच्या प्रयत्नातून मिळाल्याचा दावा प्रसिद्धी पत्रकान्वये करण्यात आला आहे. कुर्‍हा-वढोदा-ईस्लामपूर उपसा सिंचन योजनेला महाराष्ट्र राज्य मंत्री मंडळाच्या बैठकीत 2226 कोटींची तृतीय सुधारित शासन मान्यता देण्यात आली. खासदार रक्षा खडसे यांनी उपमुख्यमंत्री तथा जलसंपदा व लाभक्षेत्र विकास मंत्री देवेंद्र फडणवीस यांच्याकडे याबाबत मागणी केली होती. या योजनेला मंजुरी देण्यात येईल असे आश्वासन देऊन अपर मुख्य सचिव जलसंपदा विभाग यांना तत्काळ कार्यवाही करणे बाबत आदेश दिले होते.