कोकणात येत्या 24 तासांत मुसळधार पाऊस!
मुंबई : कडाक्याच्या उन्हाने भाजून निघालेल्या मराठवाडा, पश्‍चिम महाराष्ट्र आणि खान्देश भागात काल पावसाने अचानक हजेरी लावून दिलासा दिला, तसा आता येत्या 24 तासास पावसाची ही कृपा कोकणवासीयांवरही होणार आहे. कोकणवासियांनाही थोडा गारवा अनुभवायला मिळणार आहे. येत्या 24 तासांत दक्षिण-मध्य महाराष्ट्र आणि दक्षिण कोकणातील काही भागात गडगडाटासह मुसळधार पाऊस पडण्याचा अंदाज प्रादेशिक हवामान खात्याने वर्तवला आहे.
काल सांगली आणि वाशिम जिल्ह्यातील काही भागात पावसाने हजेरी लावली. अचानक आलेल्या पावसामुळे लोकांची तारांबळ उडाली. राज्यातील सर्वच जिल्ह्यात उन्हाचे चटके बसत आहेत. अगदी महाबळेश्‍वरसारख्या थंड हवेच्या ठिकाणीही तापमानाने तिशी पार केली. रायगडमधील भीरामध्ये तर सर्वोच्च तापमानाची नोंद झाली. त्यामुळे पावसाच्या शिडकाव्याने उन्हाची काहिली काही प्रमाणात कमी होऊन, लोकांना गारवा अनुभवायला मिळेल, एवढे निश्‍चित.