क्रीडानगरी म्हणून शहराची ओळख निर्माण व्हावी – आमदार जगताप

कासारवाडी (प्रतिनिधी) – पिंपरी-चिंचवड शहर ही औद्योगिक नगरी म्हणून ओळखली जाते. औद्योगिकनगरी बरोबरच ही क्रीडानगरी म्हणून ओळखली जावी. यासाठी महापालिकेच्या वतीने क्रीडा स्पर्धांचे आयोजन केले जाते, असे मत आमदार लक्ष्मण जगताप यांनी केले. पिंपरी-चिंचवड महानगरपालिकेच्या वतीने कासारवाडी येथे उभारण्यात आलेल्या लाल बहाद्दूर शास्त्री क्रीडांगणाचे तसेच अभिनव गगन स्पोर्टस् क्लब यांच्या सहकार्याने माजी महापौर रंगनाथ सदाशिव फुगे महापौर चषक राज्यस्तर खो-खो स्पर्धेचे उद्घाटन आमदार जगताप यांच्या हस्ते झाले. त्याप्रसंगी ते बोलत होते.

महापौर नितीन काळजे यांच्या अध्यक्षतेखाली झालेल्या या कार्यक्रमास माजी महापौर रंगनाथ फुगे, उपमहापौर शैलजा मोरे, स्थायी समिती सभापती सीमा सावळे, सत्तारुढ पक्षनेता एकनाथ पवार, कला, क्रीडा साहित्य व सांस्कृतिक समिती सभापती लक्ष्मण सस्ते, शहरसुधारणा समिती सभापती सागर गवळी, अ प्रभाग अध्यक्ष केशव घोळवे, क प्रभाग अध्यक्षा अश्‍विनी जाधव, ह प्रभाग अध्यक्ष अंबरनाथ कांबळे, रोहित काटे, नगरसदस्या आशा धायगुडे-शेंडगे, स्वाती काटे, सारीका बोर्‍हाडे, स्वीकृत सदस्य माऊली थोरात, शहर अभियंता अंबादास चव्हाण, सहाय्यक आयुक्त अण्णा बोदडे, कार्यकारी अभियंता संजय घुबे, पुणे जिल्हा खो-खो असोसिएशनचे सचिव सचिन गोडबोले, अर्जुन पुरस्कार विजेते श्रीरंग इनामदार, क्रीडा अधिकारी रज्जाक पानसरे, क्रीडा प्रशासन अधिकारी राजेश जगताप, महानगरपालिका शाळेतील विद्यार्थी व खेळाडू मोठ्या संख्येने उपस्थित होते.

चांगल्या खेळाडू तयार व्हावेत!
यावेळी आमदार लक्ष्मण जगताप म्हणाले, भविष्यात या शहरातून चांगल्या खेळाडू तयार व्हावेत म्हणून महानगरपालिका प्रयत्नशील आहे. विविध क्रीडा स्पर्धांमध्ये पिंपरी-चिंचवड मधील हे खेळाडू सहभागी होऊन शहराचे नाव नोंदवतील. राज्यस्तरीय बक्षिसांचे मानकरी ठरतील. त्यासाठी खेळाडूंनी प्रयत्न करावेत. महापालिका त्यांना संपूर्ण सहकार्य करेल. कष्ट घेऊन प्रयत्न केल्यास त्यांना हमखास यश मिळते.

महापालिका करते आयोजन
महापौर नितीन काळजे म्हणाले की, कासारवाडी येथील लाल बाहाद्दूर शास्त्री क्रीडांगणाचा शहरातील खेळाडूंना चांगला उपयोग होणार आहे. या क्रीडांगणामध्ये खेळल्या जाणार्‍या विविध खेळाद्वारे शहरातून चांगले खेळाडू निर्माण होण्यास मदत होणार आहे. विविध खेळांमध्ये जिल्हा राज्य, केंद्रासह देश विदेशातही नावलौकिक करणारे खेळाडू घडविण्यासाठी पिंपरी-चिंचवड महानगरपालिकेच्या माध्यमातून अशा प्रकारच्या स्पर्धांचे आयोजन करण्यात येत आहे. या स्पर्धेमध्ये आठ पुरुष गट व आठ महिला संघांनी सहभाग घेतला असून त्यामध्ये 224 खेळाडूंचा समावेश आहे.