खराबवाडीमध्ये नाल्यात एलपीजी गॅस टँकर उलटला 

चाकण :  चालकाचे नियंत्रण सुटल्याने गॅसने भरलेला एचपी कंपनीचा टँकर सोमवारी (दि.10) दुपारी बाराचे सुमारास रस्त्यालगतच्या खोल नाल्यात उलटल्याची घटना चाकण-तळेगाव रस्त्यावर खराबवाडी (ता. खेड) येथे महादेवी मंदिराच्या समोर घडली. यामुळे या मार्गावरील वाहतूक दिवसभर विस्कळीत झाली होती. अपघातग्रस्त टँकरखाली एक महिला अडकून पडली होती. मात्र शिताफीने तिला बाहेर काढून रुग्णालयात दाखल करण्यात आले आहे. सुदैवाने गॅस लिकेज न झाल्यामुळे कोणतीही जीवित हानी झाली नाही.

एच.पी.कंपनीचा एलपीजी गॅस टँकर (एम एच 04 जे के 4149) खराबवाडी गावच्या हद्दीतील महादेवी मंदिराच्या समोरील भागात आला होता. समोरील वाहनाने हुलकावणी दिल्यानंतर रस्त्याचा अंदाज न आल्याने चालकाकडून टँकर रस्त्यालगतच्या खोल नाल्यात उलटला. टँकर पलटी झाल्यामुळे मोठा आवाज झाल्याने या परिसरातील नागरिकांनी घटनास्थळी धाव घेतली. त्यावेळी गॅस टँकर खोल नाल्यात पडल्याचे व त्याखाली एक महिला अडकल्याचे निदर्शनास आले. स्थानिकांनी अत्यंत शिताफीने त्या महिलेला बाहेर काढून रुग्णालयात पाठविल्याचे स्थानिक कार्यकर्ते विशाल खराबी यांनी सांगितले. अपघातानंतर स्थानिकांनी पोलिसांना कळविले. त्यानंतर पोलिसांनी तळेगाव चाकण रस्त्यावरील वाहतूक चाकण येथील तळेगाव चौकात आणि खालुंब्रे येथील मेरीएट चौकातून वळविण्यात आली. एचपी कंपनीच्या अधिकारी घटनास्थळी पोहचून पोलिसांच्या उपस्थितीत टँकरची तपासणी केली. टँकरमधून गॅस गळती होत नसल्याची खात्री केली. त्यानंतर घटनास्थळी पोलीस आणि एचपीच्या अधिकार्‍यांनी अग्निशमन दलाचे दोन बंब पाचारण करून चार मोठ्या क्रेनच्या साह्याने नाल्यात पडलेला अपघातग्रस्त टँकर बाहेर काढण्याचे प्रयत्न रात्री उशिरापर्यंत सुरु होते.

रस्ता ओलांडून बँकेत निघालेली महिला रुपा रमाकांत मुलघे (वय 32, रा. खराबवाडी) अपघातग्रस्त टँकरसह फरपटत नाल्यात टँकर खाली अडकल्या. त्यांचा हात टँकरच्या खालून बाहेर आलेला स्थानिकांनी पहिल्याने अत्यंत शिताफीने त्यांना बाहेर काढून तत्काळ रुग्णालयात देण्यात आले. शिवाय या टँकरमध्ये एचपी कंपनीचा सुमारे 17 टन गॅस होता मात्र टँकरचे मुख्य व्हॉल्व्ह शाबूत राहिल्यानेच गॅस गळती झाली नाही व मोठा अनर्थ टळला. अपघातग्रस्त टँकर खाली आणखी कुणी अडकले आहे काय, या बाबत चिंता व्यक्त होत होती. मात्र रात्री सातचे सुमारास  टँकर क्रेनच्या साह्याने उचलल्यानंतर त्याखाली आणखी कुणीही अडकले नसल्याची खात्री झाली.