खराब रस्त्यांमुळे भुसावळ आयशर ट्रक उलटला : दाम्पत्य बचावले

लोटगाडीचे नुकसान : डांबरीकरणापूर्वी किमान डागडूजी हवी

भुसावळ ः सावद्याकडून जळगावकडे जाणारा आयशर ट्रक शहरातील सरदार वल्लभाई पटेल पुतळ्याजवळ रस्त्यावरील खड्डे चुकवताना अचानक उलटून फळ विक्रीच्या लोटगाडीवर आदळला. शुक्रवारी दुपारी साडेतीन वाजेच्या सुमारास हा अपघात झाला. या अपघातात एका फळ विके्रत्याच्या लोटगाडीचे सुमारे 10 ते 12 हजारांचे नुकसान झाले तर सुदैवाने भोई दाम्पत्य बचावले.

खराब रस्त्यांमुळे चौथ्यांदा अपघात
शहरातील खराब रस्त्यांमुळे अपघात नित्यांचे झाले असून साधी डागडूजीदेखील नसल्याने वाहनधारकांमध्ये सत्ताधार्‍यांविषयी प्रचंड रोष आहे. जुना सतारा भागातील सरदार वल्लभभाई पुतळ्याजवळ अपघात होण्याची आजची मिळून चौथी घटना आहे. सावद्याहून जळगावकडे कडबा घेवून जाणारा आयशर ट्रक (एम.एच.19 झेड.5576) हा खड्डे चुकवण्याच्या प्रयत्नात उलटला. या आयशर ट्रकचा मागील भाग फळांच्या लोटगाडीला लागल्याने नुकसान झाले तर बाजीराव भोई व त्यांच्या पत्नी सुदैवाने बचावल्या. अपघातानंतर शहर पोलिसांनी धाव घेत गर्दी हटवली.