खासगी लॅबमध्येही करोना टेस्ट मोफत करा – सुप्रीम कोर्ट

नवी दिल्ली: करोना विषाणूची तपासणी मोफत करावी असे निर्देश सुप्रीम कोर्टाने आज केंद्र सरकारला दिले. इतकेच नाही, तर खासगी लॅबमध्ये देखील करोना विषाणूची तपासणी मोफतच करण्यात यावी असेही सुप्रीम कोर्टाने म्हटले आहे. खासगी लॅबमध्ये तपासणीची प्रक्रिया काय असावी याबाबत निश्चित असे धोरणही ठरवावे असेही सुप्रीम कोर्टाने म्हटले आहे.

करोना तपासणी आणि प्रसाराला पायबंद घालण्यासाठी प्रयत्नशील असणारे डॉक्टर्स, नर्सेस आणि वैद्यकीय कर्मचारी यांच्या सुरक्षेबाबत सुप्रीम कोर्टात आज सुनावणी पार पडली. देशभरात करोनाचा उद्रेक झालेला असताना वैद्यकीय कर्मचार्‍यांची सुरक्षा अत्यंत महत्त्वाचे असून हे सर्वजण योद्धा आहेत. त्यांच्या कुटुंबीायंची सुरक्षाही महत्त्वाची आहे, असे सुप्रीम कोर्टाने म्हटले आहे. कोरोना विषाणूची तपासणी खासगी लॅबमध्येही विनामूल्य करण्यात यावी, असे सुप्रीम कोर्टाने म्हटले आहे. या संदर्भात योग्य तो आदेश पारित करण्यात येईल, असेही सुप्रीम कोर्टाने म्हटले आहे. कोरोनाचा मुकाबला करण्यासाठी केंद्र सरकार सर्वतोपरी प्रयत्न करीत असल्याचेही सरकारच्या वतीने यावेळी सुप्रीम कोर्टाला सांगण्यात आले.