खासदार प्रितम मुंडे यांच्याविषयी फेसबुकवरील पोस्टवर चुकीची टिप्पणी

निगडी:बीड लोकसभा मतदार संघाच्या खासदार डॉ.प्रितम मुंडे यांच्या विषयी फेसबुक पोस्टवर आक्षेपार्ह कमेंट करणार्‍या शिक्षक संजय कुर्‍हाडे यांचे निलंबन करण्याची मागणी भाजप महिला मोर्चा पिंपरी-चिंचवड शहर अध्यक्षा शैला मोळक यांनी केली. शैला मोळक यांनी याबाबतचे पत्र कॅम्प एज्युकेशन सोसायटीच्या प्रेरणा विद्यालयाच्या प्राचार्या शुभांगी इथापे यांना दिले. यावेळी उमा खापरे, संगीता सुतार, अरुणा घोळवे, सारिका चव्हाण, रेखा कडाली, सविता कर्वे, राधिका बोर्लीकर, शोभा भराटे, माधवी इनामदार, राजश्री जायभाय, पल्लवी वाल्हेकर, अश्‍विनी औसेकर, अश्‍विनी दाभाडे आदी उपस्थित होते.

प्राचार्यांना दिलेल्या पत्रात म्हटले आहे की, कॅम्प एज्युकेशन सोसायटीच्या निगडी येथील प्रेरणा विद्यालयातील सहशिक्षक संजय कुर्‍हाडे याने आमदार पंकजा मुंडे यांच्या फेसबुक पोस्टवर खासदार डॉ. प्रितम मुंडे यांच्याबाबत अश्‍लील कमेंट केली. महिलांच्या सुरक्षेबाबत समाजात चर्चा झडत असताना अशा प्रकारच्या कमेंट करणे चुकीचे आहे. प्रेरणा विद्यालयातील सहशिक्षकाने केलेल्या या कृत्याबद्दल त्याला तात्काळ संस्थेतून निलंबित करण्यात यावे, अशी मागणी पत्रात केली.