गावठी कट्ट्यासह तरुण जाळ्यात : जळगाव एमआयडीसी पोलिसांच्या जाळ्यात

जळगाव : गावठी कट्टा बाळगणार्‍या तरुणाच्या जळगाव एमआयडीसी पोलिसांच्या गुन्हे शोध पथकाने मुसक्या आवळल्या आहेत. पवन उर्फ माठ्या केशव गावळे (24, रा.संभाजी चौक, शिवाजी नगर, जळगाव) असे अटकेतील तरुणाचे नाव असून संशयीताच्या ताब्यातून 15 हजार रुपये किंमतीचा गावठी कट्टा जप्त करण्यात आला.

गोपनीय माहितीवरून कारवाई

शहरातील पांडे डेअरी चौकात एक संशयीत गावठी कट्टा घेवून फिरत असल्याची माहिती हवालदार मिलिंद सोनवणे यांना मिळाल्यानंतर पोलिस उपनिरीक्षक दीपक जगदाळे, सहाय्यक फौजदार आनंदसिंग पाटील, सहाय्यक फौजदार अतुल वंजारी, पोलिस हवालदार मिलिंद सोनवणे, पोलिस नाईक विकास सातदिवे, पोलिस नाईक सचिन पाटील आदींनी संशयीत माठ्या गावळेच्या मुसक्या आवळल्या. मंगळवार, 1 रोजी सायंकाळी सात वाजता ही कारवाई करण्यात आली. कॉन्स्टेबल छगन तायडे यांच्या फिर्यादीनुसार संशयीताविरोधात गुन्हा दाखल करण्यात आला. पुढील तपास पोलिस हेड कॉन्स्टेबल मिलिंद सोनवणे करत आहेत.