गिरीश महाजन यांच्यासोबत झालेली बैठक निष्फळ

मुंबई – वैद्यकीय शिक्षणमंत्री गिरीष महाजन यांच्यासोबत डॉक्टरांची झालेली बैठक निष्फळ ठरली आहे. सुरक्षारक्षक पुरवण्याबाबत कुठलाही तोडगा या बैठकीत निघाला नाही. मात्र गिरीष महाजन यांनी आम्ही डॉक्टरांच्या सुरक्षेसाठी कटीबद्ध असल्याचे म्हटले आहे. जोपर्यंत सुरक्षारक्षक पुरवण्यात येत नाहीत, तोपर्यंत संप मागे घेणार नसल्याचे डॉक्टरांनी म्हटले आहे.

यावेळी बोलताना महाजन म्हणाले, की डॉक्टरांवर झालेला हल्ला निषेधार्य आहे. या पूर्वी डॉक्टरांच्या ९० टक्के मागण्या पूर्ण केल्या आहेत.आता रुग्णालयात अलार्म सिस्टीम आणि सीसीटीव्ही लावण्यात येतील असेही महाजन म्हणाले. ही सर्व व्यवस्था एका महिन्यात करण्यात येईल. डॉक्टर आज कामावर रुजू होतील, अशी अपेक्षाही त्यांनी व्यक्त केली. दरम्यान सायंकाळी सरकारची एक समिती रुग्णालयातील सुरक्षाव्यवस्थेचा आढावा घेणार आहे.