गुडन्यूज : राज्यातील पहिले करोनाग्रस्त दाम्पत्य करोनामुक्त

पुणे: गुढी पाडव्याच्या पार्श्वभूमीवर राज्यातील जनतेसाठी दिलासादायक बातमी आहे. राज्यातील पहिले करोनाग्रस्त दाम्पत्य अवघ्या १४ दिवसांतच करोनामुक्त झाले आहे. त्यामुळे या दाम्पत्याला डिस्चार्ज देण्यात आहे. हे दाम्पत्य दुबईहून आले होते. त्यांची तपासणी केली असता त्यांना करोना झाल्याचे आढळून आले होते. त्यानंतर त्यांना ९ मार्च रोजी नायडू रुग्णालयात दाखल करून त्यांच्यावर उपचार सुरू करण्यात आले होते. त्यांना विलगीकरण कक्षातही ठेवण्यात आले होते. मात्र गेल्या २४ तासात त्यांची दोनदा तपासणी करण्यात आली असता त्यांचे रिपोर्ट निगेटिव्ह आले. त्यामुळे डॉक्टरांनी सुटकेचा नि:श्वास सोडला असून या दाम्पत्याला डिस्चार्ज दिला आहे. डिस्चार्ज झाल्यानंतर या दाम्पत्याचा रुग्णालय प्रशासनाकडून सत्कार करण्यात आला. या दाम्पत्याचा आजार बरा झाल्याने करोना बरा होऊ शकतो हेच यातून दिसून आले आहे. त्यामुळे लोकांनी घाबरून जाऊ नये, मात्र गर्दीत जाऊ नये आणि सोशल डिस्टंसिंग पाळावी, असे डॉक्टरांनी म्हटले आहे.