गोपनीय माहिती उघड केल्याने ‘विकिलीक्स’चा संस्थापकाला अटक

नवी दिल्ली: गोपनीय राजनैतिक व लष्करी कागदपत्रे उघड करून जगभरात खळबळ माजविणाऱ्या ‘विकिलीक्स’चा संस्थापक ज्युलियन असांजे याला ब्रिटन पोलिसांनी अटक केली. इक्वाडोर येथील दूतावासातून त्याला ताब्यात घेतले आहे. राजनैतिक आणि लष्कराची गोपनीय कागदपत्रे उघड करणाऱ्या असांजेने अटकेच्या भीतीने लंडनमधील इक्वाडोर दूतावासात आश्रय घेतला होता. २०१२ पासून तो दूतावासात होता. प्रत्यार्पण आणि अटकेच्या भीतीने त्याने तेव्हापासून दूतावास सोडले नाही. अखेर आज त्याला ब्रिटन पोलिसांनी बेड्या ठोकल्या. ‘४७ वर्षीय असांजेला आज मेट्रोपॉलिटन पोलिसांनी इक्वाडोर येथील दूतावासातून अटक केली आहे.

इक्वाडोर सरकारने आश्रय काढून घेतल्यानंतर त्याला दूतावासात बोलावण्यात आलं होतं. त्यानंतर ब्रिटन पोलिसांनी अटक केली, असेही पोलिसांनी सांगितले. दरम्यान, लैंगिक शोषणाच्या आरोपाखाली स्वीडनला हवा असलेल्या असांजेने प्रत्यार्पण टाळण्यासाठी दूतावासात आश्रय घेतला होता.