घरकुलाच्या लाभासह शासकीय योजनांसाठी यावलमध्ये रस्ता रोको

परसाडेतील आदिवासी बांधवांच्या आंदोलनामुळे दोन तास वाहतूक ठप्प

यावल- तालुक्यातील परसाडे येथील अतिक्रमण क्षेत्रावर राहणार्‍या आदिवासी अनुसूचित जाती-जमातीच्या नागरीकांना घरकुलाचा लाभ देण्यात यावा तसेच शासकीय योजनांचा लाभ देण्यात यावा या मागणीसाठी सोमवारी दुपारी बारा ते सव्वा दोन वाजेदरम्यान बुरूज चौकात तब्बल दोन तास रास्ता रोको केल्याने वाहतूक ठप्प झाली तर पोलिसांची आंदोलकांना समजवतांना पुरती दमछाक उडाली. प्रशासनाच्या मध्यस्थीनंतर आंदोलकांनी रास्ता रोको मागे घेत तहसील कार्यालयाच्या आवारात ठिय्या मांडला. तहसीलदार कुंदन हिरे, गटविकास अधिकारी किशोर सपकाळे, पोलिस उपनिरीक्षक सुनीता कोळपकर आदींनी मध्यस्थी केल्यानंतर आंदोलकांनी रास्ता रोको सोडून तहसील कार्यालयाच्या आवारात ठिय्या मांडला.

या पदाधिकार्‍यांनी केली मध्यस्थी
या आंदोलकांसोबत शिवसेना जिल्हा उपपप्रमुख मुन्ना पाटील, सेनेचे आदिवासी विभाग प्रमुख हुसेन तडवी, रीपाईचे जिल्हाध्यक्ष आनंद बाविस्कर, युवरास सोनवणे यांनी पाठींबा दिला व तहसीलदार कुंदन हिरे, गटविकास अधिकारी किशोर सपकाळे, जितेंद्र पंजे, ग्रामसेवक मजीत तडवी आदींनी मध्यस्ती केली. दरम्यान, या जागेबाबत जिल्हाधिकार्‍यांकडे पुढील कार्यवाही करता प्रस्ताव पाठवण्यात येणार असल्याचे आश्वासन देत तोडगा काढला तर या आश्वासनानंतर आंदोलन मागे घेण्यात आले.

आंदोलनात यांचा होता सहभाग
आंदोलनात आदिवासी महासंघ महाराष्ट्राचे अध्यक्ष डॉ. शैलेंद्रकुमार गवळी, राज्याध्यक्ष युनूस तडवी, परसाडे सरपंच बबीता मंहमद तडवी, उपसरपंच रूस्तम तडवी,अल्लाउद्यीय तडवी, यासिन तडवी, फिरोज तडवी, हमीद तडवी, एकनाथ भालेराव, समाधान भालेराव, परेश तायडे, रोशन तडवी, सलीम तडवी, युनूस तडवी, आरिफा तडवी, पल्लवी अडकमोल, सविता अडकमोल, साबेरा तडवी, शोभा तायडे, गुलशान तडवी यांसह महिला पुरूषांचा मोठ्या संख्येने सहभाग होता.