चांदणी चौक उड्डाणपुलासाठी जागा उपलब्ध करून द्या!

पुणे । चांदणी चौकातील उड्डाणपुलाचे काम लवकरात लवकर सुरू करण्यासाठी पुणे महापालिकेने तात्काळ नॅशनल हायवे थॉरिटी ऑफ इंडियाकडे जागा मोकळी करून द्यावी, अशी सूचना पालकमंत्री गिरीश बापट यांनी दिली.

राष्ट्रीय महामार्गा संदर्भात व्हीव्हीआयपी सर्कीट हाउस येथे बापट यांच्या अध्यक्षतेखाली बैठक घेण्यात आली. त्यावेळी संबंधितांना त्यांनी ही सूचना केली. या बैठकीस विभागीय आयुक्त चंद्रकांत दळवी, जिल्हाधिकारी सौरभ राव, अतिरिक्त आयुक्त शीतल तेली-उगले, एनएचएआयचे प्रकल्प संचालक एस.डी. चिटणीस तसेच संबंधित विभागांचे वरिष्ठ अधिकारी उपस्थित होते. चांदणी चौक येथील प्रस्तावित उड्डाणपूल व कोथरूड येथील शिवसृष्टी या बीडीपी जागेच्या संदर्भात मुख्यमंत्र्यांबरोबर लवकरच बैठक घेवून चर्चा करण्यात येईल. याबाबतचा प्रस्ताव पुणे महानगरपालिकेने लवकरात लवकर राज्य शासनाकडे सादर करावा. चांदणी चौकामध्ये होणारे अपघात टाळण्यासाठी या ठिकाणी उड्डाणपूल होणे आवश्यक आहे. या उड्डाण पुलासाठी महापालिकेने जागा उपलब्ध करून दिल्यानंतर नॅशनल हायवे थॉरिटीने या पुलाचे काम तात्काळ हाती घेऊन गतीने पूर्ण करावे. महामार्गांच्या कामांचे प्रस्ताव सादर करतांना जिल्हाधिकारी आणि संबंधित विभागांच्या अधिकार्‍यांशी समन्वय ठेवून सादर करावेत, जेणेकरून अनावश्यक खर्च टाळता येईल. आळंदी ते पंढरपूर या पालखी मार्गाचा विकास करतांना देहू ते आळंदी या मार्गाचा विकास होणेही आवश्यक आहे. पालखी मार्गावरील रस्त्यांची कामे करत असतांना स्वच्छतागृहांची कामेही प्राधान्याने करावीत. भक्तनिवासची कामे सर्व सोयी-सुविधांनी युक्त करावीत. आळंदी येथे वारकर्‍यांसाठी पार्किंग व्यवस्थेवर भर देण्यात यावा.

वाहतूककोंडी सोडविण्यासाठीच्या उपाययोजनांबाबत बैठकीत चर्चा
यावेळी राष्ट्रीय महामार्गावर सुरु असणारी कामे तसेच पुर्ण व अपूर्ण कामांच्या सद्यस्थितीचा आढावा श्री. बापट यांनी घेतला. ते म्हणाले, या वर्षीची रस्त्यांची कामे मार्च अखेरपर्यंत पूर्ण करावीत. याबाबत संबंधीत अधिकारी आणि विविध कंपन्यांशी चर्चा करुन सर्व कामे गतीने पूर्ण करा. या कामांच्या प्रगतीचा अहवाल पुढील महिन्यात होणार्‍या बैठकीत सादर करावा. यावेळी जिल्हयातील महामार्गांवरील उड्डाणपूल, भुयारी मार्ग, पालखी मार्गावरील कामे, स्वच्छतागृहे तसेच नर्‍हे-वडगाव येथील नवले पूलानजीक होणारी वाहतूककोंडी सोडविण्यासाठीच्या उपाययोजनांबाबत बैठकीत चर्चा झाली.