चाकण बाजारात कांद्याची आवक वाढली

चाकण (हनुमंत देवकर ): खेड कृषी उत्पन्न बाजार समितीच्या चाकण येथील महात्मा फुले मार्केट यार्डमध्ये कांद्याची आवक वाढून भाव किंचितसे घटले. तर बटाटा, भुईमूग शेंगा, लसूणची आवक स्थिर झाली. भुईमूग शेंग, लसूण, बटाट्याचे भाव स्थिर राहिले. बाजारात एकूण उलाढाल 2 कोटी 10 लाख रुपयांची झाली. राजगुरुनगर मार्केटमध्ये या आठवड्यात मेथी वगळता पालेभाज्यांची आवक घटली. या आठवड्यात शेलपिंपळगाव उपबाजारात भाज्यांची आवक घसरली. चाकणला पालेभाज्यांच्या बाजारात पालक, वगळता कोथिंबीर, शेपू, मेथीची आवक कमी झाली. जनावरांच्या बाजारात शेळ्या-मेंढ्या, म्हशी, बैल यांच्या संख्येत वाढ झाली. तसेच, जर्सी गायींच्या संख्येत घट झाली.

1300 क्विंटल कांद्याची आवक
चाकण बाजारात कांद्याची एकूण आवक 1300 क्विंटल झाली. गेल्या शनिवारच्या तुलनेत ही आवक 550 क्विंटलने वाढून भाव 2600 रुपयांवरुन 2500 रुपये झाले. तळेगाव बटाट्याची एकूण आवक 1445 क्विंटल झाली. गेल्या शनिवारच्या तुलनेत ही आवक 345 क्विंटलने वाढून कमाल भाव 700 रुपयांवर स्थिर झाले. लसणाची एकूण आवक 6 क्विंटल झाली. या आठवड्यात लसणाची आवक वाढून कमाल भाव 5000 रुपयांवर स्थिर झाले. हिरव्या मिरचीची एकूण आवक 350 क्विंटल झाली. भावात घट झाली. हिरव्या मिरचीला 2000 ते 3000 रूपये असा कमाल भाव मिळाला.