चालकाला लुटणार्‍यांना अटक
हिंजवडी – ट्रक चालकाला अडवून लुटणार्‍या दोघांना हिंजवडी पोलिसांनी अटक केली आहे. संजय शिंदे (वय 50, नारायणगाव, ता. जुन्नर) यांनी याप्रकरणी हिंजवडी पोलीस ठाण्यात फिर्याद दिली. अशोक माकोडे (वय 22, रा. चिंचवड) आणि योगेश बाठे (वय 21, रा. किरकटवाडी) अशी अटक करण्यात आलेल्या आरोपींची नावे आहेत.
संजय ट्रक चालक म्हणून काम करतात. शनिवारी रात्री ते पुणे मुंबई महामार्गावरून जात होते. महामार्गावरील शिरोळे पेट्रोल पंपाजवळ त्यांच्या ट्रकला हात करून दोघांनी अडविले. शिंदे यांना अशोक आणि योगेश या दोघांनी दम दिला. तसेच त्यांच्या खिशातून जबरदस्तीने पैसे काढून घेण्याचा प्रयत्न केला. दरम्यान, हिंजवडी पोलीस ठाण्याचे गस्ती पथक महामार्गावरून जात असताना ही बाब त्यांच्या लक्षात आली. त्यावरून त्यांनी आरोपींची चौकशी केली. त्यावेळी आरोपींकडे सत्तूर आणि तलवार शस्त्रे सापडली. दोघांकडे कसून चौकशी केली असता, लूटमार करण्याच्या उद्देशाने संजय यांचा ट्रक अडविल्याचे दोघांनी मान्य केले. अशोक आणि योगेश या दोघांना अटक करण्यात आली आहे. हिंजवडी पोलीस तपास करीत आहेत.