छिंदमने महापौर निवडीसाठी सेनेला केले मतदान; सेनेकडून सभागृहातच मारहाण

अहमदनगर : छत्रपती शिवाजी महाराज यांच्याबद्दल अवमानकारक वक्तव्य करणारा अहमदनगर महानगरपालिकेचा नवनियुक्त नगरसेवक श्रीपाद छिंदम याने आज महापौर निवडणुकीत शिवसेनेला मतदान केले. त्यामुळे शिवसेनेने सभागृहात छिंदम याला मारहाण करत त्याचे मतदान नाकारले आहे.

ही भाजप व राष्ट्रवादी  खेळी आहे, असा आरोप शिवसेनेने केला आहे. शिवरायांबद्दल आक्षेपार्ह वक्तव्य करणाऱ्याचे मत शिवसेनेने स्वीकारल्यास वाईट संदेश जाईल, याची दखल घेत शिवसेनेने छिंदम यांचे मत नाकारत चोप दिला.

छिंदम अपक्ष म्हणून निवडून आला आहे. तो कोणाला मतदान करणार याची उत्सुकता होती. त्याने सेनेने उमेदवार बाळासाहेब बोराटे यांना मतदान करण्यासाठी हात उंचावला. त्यावेळी सेनेच्या नगरसेवकांनी त्याला सभागृहातच मारहाण केली. सेनेने पुढील निवड प्रक्रियेवर बहिष्कार घालत सभात्याग केला. आम्ही छिंदमचे मत मागितले नव्हते.मात्र, भाजपचे खासदार दिलीप गांधी व राष्टÑवादीचे आमदार संग्राम जगताप यांनी छिंदमशी हातमिळवणी करुन मुद्यामहून आम्हाला बदनाम करण्यासाठी त्याला सभागृहात उपस्थित ठेवून सेनेला मतदान करायला लावले, असा आरोप सेनेचे बाळासाहेब बोराटे व युवराज गाडे यांनी केला आहे. या प्रकारामुळे सेनेने उपमहापौर पदाच्या निवडणुकीवरही बहिष्कार टाकण्याचे धोरण स्वीकारले. छिंदमला आम्ही सभागृहातच चोपले असा दावा सेनेने केला आहे. श्रीपाद छिंदमचे मत शिवसेनेच्या कोट्यात मोजण्यात आले आहे. सेनेला स्वत:चे २३ व छिंदमचे १ आणि सपाचे १ असे २५ मते मिळाली.