छिंदम यांचे पद रद्द करा; कोर्टात याचिका

अहमदनगर – छत्रपती शिवाजी महाराजांविषयी आक्षेपार्ह वक्तव्य करणारे नगरसेवक श्रीपाद छिंदम पुन्हा अहमदनगर महानगर पालिकेत निवडणून आले आहे. दरम्यान श्रीपाद छिंदमच्या विरोधात निवडणूक लढविणाऱ्या निलेश म्हसे यांनी याबाबत जिल्हा न्यायालयात याचिका दाखल केली आहे. तसेच, छिंदमच्या विजयाला आव्हान देत ही निवड रद्दबातल ठरविण्याची मागणी या याचिकेद्वारे करण्यात आली आहे.

शिवरायांबद्दल आक्षेपार्ह वक्तव्य करणाऱ्या श्रीपाद छिंदमने अहमदनगर महापालिकेची निवडणूक लढवली होती. विशेष म्हणजे अपक्ष निवडणूक लढवूनही छिंदम या निवडणुकीत विजयी झाला आहे. मात्र, छिंदमच्या या विजयाला आक्षेप घेण्यात आला आहे. यापूर्वी जिल्ह्यातून तडीपार केल्याची मुदत संपल्यानंतर मंगळवारी ११ रोजी छिंदम छत्रपतींसमोर नतमस्तक झाला. महापलिका निवडणुकीत विजय मिळाल्यानंतर छिंदम नगरमध्ये दाखल झाला. त्याने आपल्या कार्यालयात शिवाजी महाराजांसह डॉ. बाबासाहेब आंबेडकर, महात्मा ज्योतिबा फुले, लोकशाहीर अण्णाभाऊ साठे यांच्या पुतळ्यास पुष्पहार अर्पण करून अभिवादन केले.

छिंदमविरोधात अनिता राजेंद्र राठोड (राष्ट्रवादी), सुरेश रतनप्रसाद तिवारी (सेना), प्रदीप परदेशी (भाजप), पोपट भानुदास पाथरे (मनसे), प्रवीण शाहूराज जोशी (अपक्ष), निलेश सत्यवान म्हसे (अपक्ष), अजयकुमार अरुण लयचेट्टी (अपक्ष) हे उमेदवार निवडणुकीच्या रिंगणात होते. त्यापैकी अपक्ष उमेदवार निलेश म्हसे यांनी छिंदमविरोधात न्यायालयात धाव घेतली आहे. या निवडणूक काळात प्रशासनाने छिंदमला शहरातून हद्दपार केले होते. सोमवारी निकाल जाहीर झाल्यानंतर मंगळवारी छिंदमने त्यांच्या दिल्लीगेट येथील कार्यालयात येऊन प्रथम महापुरूषांना अभिवादन केले.