जळगावकरांच्या सावल्या 26 मे ला गायब होणार

जळगाव । आपण नेहमी म्हणतो की रोज 12 वाजता सूर्य आपल्या डोक्यावर येतो. पण रोज तसे घडत नाही. असा योग वर्षातून फक्त दोनच वेळेस येतो. सावलीनुसार 12 वाजतात व हातातील घड्याळानुसार 12 वाजून काही मिनिटांनी डोक्यावर येतो आणि आपली सावली पायापाशी पडते. निसर्गाच्या या घटनेला ‘शून्य सावली दिवस’ किंवा ‘झीरो शॅडो डे’ असे म्हणतात. हा योग येत्या शुक्रवारी 26 मे रोजी घडून येत आहे. जळगाव 21.00 अंश उत्तर या अक्षांशावर आहे. 21 मार्च ते 21 जून या काळात 26 मे रोजी सूर्याचे डेक्लीनेशन जळगावच्या अक्षांशाइतके असते. म्हणून त्या दिवशी आपल्या शहरात 12 वाजून 25 मिनिटांनी ‘झिरो शॅडो डे’ असतो. 21 जून नंतर परतीच्या प्रवासात 18 जुलैला सूर्याचे डेक्लीनेशन परत आपल्या अक्षांशाइतके असते त्यावेळी दुसर्‍यांदा आपल्याकडे ‘झिरो शॅडो डे’ असतो. अशा पद्धतीने वर्षातून दोन वेळा सूर्य 12 वाजून 25 मिनिटांनी आपल्या डोक्यावर येतो. या भौगोलिक घटना प्रात्यक्षिकव्दारे समजून घेता येणार आहे. अमोघ जोशी हे महाबळ कॉलनी येथे हे प्रात्यक्षिक दाखविण्यात येणार आहे. खगोलप्रेमींनी उपस्थित राहून विज्ञान समजून घ्यावे असे आवाहन करण्यात आले आहे.