जळगावात कामगाराला 90 हजारांचा ऑनलाईन गंडा

जळगाव : क्रेडीट कार्डवर झालेल्या व्यवहारांचा तपशील सांगत जळगावातील कामगाराचा विश्वास संपादन करीत अज्ञात भामट्याने कामगाराला 90 हजारांचा ऑनलाईन गंडा घातला. ही घटना तब्बल एका महिन्यानंतर उघड झाली. याबाबत एमआयडीसी पोलिसात गुन्हा दाखल करण्यात आला.

ऑनलाईन फसवणुकीच्या घटना वाढल्या
क्रेडिट कार्ड बंद करण्याच्या बहाण्याने अनिल कुमार इंद्रदत्त त्रिपाठी (52, रा.एमआयडीसी, जळगाव) या प्रौढाची 90 हजार 780 रुपयांत ऑनलाईन फसवणूक झाल्याची घटना उघड झाली. त्रिपाठी यांनी 3 नोव्हेंबर रोजी बँकेत जावून व्यवहार तपासले असता त्यांना त्यांच्या खात्यातून 90 हजार 780 रुपये काढण्यात आल्याचे निदर्शनास आले. त्रिपाठी हे एमआयडीसीतील खान्देश फ्लोअर मिलमध्ये खाजगी नोकरी करतात. याचठिकाणी कुटुंबासह वास्तव्यास आहेत. 30 ऑक्टोंबर रोजी ते खान्देश मिल येथे कंपनीत कामावर जात असतांना त्यांना 9371777554 या क्रमांकावरुन अनोळखी व्यक्तीचा फोन आला. त्याने त्रिपाठी यांना त्यांनी क्रेडीट कार्डच्या आधारावर केलेल्या सर्व व्यवहारांचे तपशील सांगत त्रिपाठी यांचा विश्वास संपादन केला. अतिरीक्त चार्ज लागत असल्याने त्रिपाठी यांनी संबंधितांना मला क्रेडीट कार्ड नकोय ते बंद करा, असे सांगितले. क्रेडिट कार्ड बंद करण्याच्या बहाण्याने संबंधितांनी त्रिपाठी यांच्या मोबाईलवर आलेला ओटीपी विचारला. ओटीपी सांगताच त्रिपाठी यांच्या बँकेच्या खात्यातून 90 हजार 780 संबंधितांनी काढून घेतले.

एमआयडीसी पोलिसात गुन्हा दाखल
त्यानंतर संबंधीत फोनवर बोलणार्‍या व्यक्तीने त्रिपाठी यांना थॅक्यू म्हणून फोन कट केला. तसेच पुढील दोन दिवसात कुणाचेही फोन उचलू नका अन्यथा क्रेडीट कार्ड पुन्हा सुरू होईल अशी बतावणी केली. 3 नोव्हेंबर रोजी त्रिपाठी त्यांचे खाते असलेल्या स्टेट बँकेत गेले असता त्यांना त्यांच्या खात्यावरुन 90 हजार 780 रुपये काढून घेतल्याचे दिसून आले. 30 ऑक्टोंबर रोजी क्रेडीट कार्ड बंद करण्याच्या बहाण्याने फोनवर बोलणार्‍या अनोळखी व्यक्तीने आपली फसवणूक केल्याची खात्री झाल्यावर त्रिपाठी यांनी गुरुवारी एमआयडीसी पोलिसात तक्रार दिली. त्यावरुन गुन्हा दाखल करण्यात आला आहे. पुढील तपास पोलीस उपनिरीक्षक रवींद्र गिरासे करीत आहेत.