जाचकवस्तीवर एकाची आत्महत्या

चाकण : विषारी औषध प्राशन करून पन्नासवर्षीय इसमाने आत्महत्या केल्याची धक्कादायक घटना चाकण जवळील जाचकवस्ती वरील एका शेतात सोमवारी सकाळी उघडकीस आली. मात्र, संबंधित इसमाच्या आत्महत्येचे नेमके कारण रात्री उशिरापर्यंत समजले नसल्याने येथील पोलिसांनी आकस्मित मयत अशी नोंद केली आहे. मारुती बाबुराव धाडगे (वय 50, मूळ रा. दावडी) असे विषारी औषध प्राशन करून आत्महत्या केलेल्या इसमाचे नाव आहे. काळूस गावचे पोलीस पाटील संदीप किसन पवळे (वय 41, रा.खेड) यांनी याप्रकरणी चाकण पोलीस ठाण्यात फिर्याद दिली.

पोलिसांनी दिलेल्या माहितीनुसार, मारुती धाडगे हे मुळचे दावडी (ता. खेड) येथील राहणारे रहिवाशी आहेत. धाडगे यांनी सोमवारी (दि.22 ऑक्टोबर) सकाळी आठ वाजण्याच्या दरम्यान चाकण जवळील काळूस गावच्या हद्दीतील जाचक वस्तीवरील बबन विठ्ठल जाचक यांच्या शेतात विषारी औषध प्राशन करून आत्महत्या केली. त्यांच्या आत्महत्येचे नेमके कारण रात्री उशिरापर्यंत समजले नसल्याने येथील पोलिसांनी आकस्मित मयत अशी नोंद केली आहे. चाकण ग्रामीण रुग्णालयात धाडगे यांच्या मृतदेहाची उत्तरीय तपासणी करून शवविच्छेदन होताच त्यांचा मृतदेह अंत्यसंस्कारासाठी रात्री उशिरा त्यांच्या नातेवाईकांच्या ताब्यात देण्यात आला. चाकण पोलीस ठाण्याचे वरिष्ठ पोलीस निरीक्षक सुनील पवार यांच्या मार्गदर्शनाखाली या प्रकरणी अधिक तपास सुरु आहे.