जिल्हा परिषद प्राथमिक शाळेतील विद्यार्थ्यांना व्यवहार ज्ञानाचे धडे

ज्ञानरचनावादी अभ्यासक्रमानुसार बालआनंद मेळावा व आठवडे बाजाराचे आयोजन

कवठे येमाई : शालेय जीवनातच विद्यार्थ्यांना व्यवहार ज्ञान मिळावे. व्यवसाय करताना वस्तू खरेदी करून ती वस्तू नफ्यात कशी विकावी हे कौशल्य प्राप्त व्हावे, तसेच ग्राहकांशी कसे बोलावे? आपली वस्तू कशी चांगली आहे हे पटवून देण्याची कला विद्यार्थ्यांनी आत्मसात करून घ्यावी, या उद्देशाने आमदाबाद येथील जिल्हा परिषद शाळेत नुकताच बाल आनंद मेळावा व आठवडे बाजार भरविण्यात आला होता.

विक्रीसाठी विद्यार्थ्यांनी आणला शेतमाल

या आठवडे बाजाराला मोठा प्रतिसाद मिळाला. या बाजारात प्रामुख्याने भाजीपाला जास्त प्रमाणात दिसून आला. कांदा, कांद्याची पात, कोथिंबीर, पालक, वांगी, मिरची, गवती चहाची पाने, हरभरा, चिंचा इत्यादी शेतमाल त्याचबरोबर कागदाच्या वस्तू, विविध खाद्यपदार्थ मुलांनी विक्री करीता आणले होते. या बाजाराचे उद्घाटन माजी सरपंच योगेश थोरात व त्यांच्या पत्नी स्नेहल यांच्या हस्ते करण्यात आले. यावेळी सरपंच लता नर्‍हे, जिजाबाई माशेरे, रंगनाथ थोरात, नितिन थोरात यांनी शाळेचे कौतुक करत खरेदीचा आनंद लुटला.

असे उपक्रम विद्यार्थ्यांना फायदेशीर

शाळेचे मुख्याध्यापक जनार्दन फलके, पदवीधर शिक्षक सुनिता जगताप यांनी या मेळाव्याचे उत्तम नियोजन केले. तर पदवीधर शिक्षक मनोज गांधी यांनी आभार मानले. शाळेचे सहशिक्षक आबा पवार, शिक्षक समितीचे सरचिटणीस नामदेव गायकवाड यांनी कार्यक्रम यशस्वीतेसाठी परिश्रम घेतले. एकंदरीत पाठ्यपुस्तकातील ज्ञानाचा व्यवहारात यशस्वी उपयोग करण्यासाठी आमदाबाद शाळेने राबविलेल्या आठवडे बाजार सारख्या उपक्रमाचा विद्यार्थ्यांना निश्‍चित फायदा होईल, यात तिळमात्र शंका नाही.

वाण म्हणून केले पुस्तके वाटप

शाळेतील आठवडे बाजारनिमित्त शाळेतील शिक्षक व व्यवस्थापन समितीने हळदी-कुंकवाचा कार्यक्रमही केला. वाचन संस्कृती जोपासण्यासाठी वाण म्हणून पुस्तकांचे वाटप करण्यात आले. शाळेच्या वतीने महिला शिक्षिका सुनिता जगताप, विद्यार्थी यांच्या हस्ते आलेल्या प्रत्येक महिला पालक व गावातील शाळेला भेट देणार्‍या महिलांना पुस्तकरुपी वाण देण्यात आले. यावेळी माजी सरपंच योगेश थोरात, तसेच विद्यमान सरपंच लता नर्‍हे यांनी मराठी माध्यमांच्या शाळांमध्ये आपल्या पाल्यांना पाठवण्याचे आवाहन यावेळी केले. पदवीधर शिक्षक मनोज गांधी यांनी शाळेने राबवलेले विविध उपक्रम व मुलांच्या प्रगतीबद्दल माहिती उपस्थित पालकांना दिली.