जिल्हा शिक्षण मंडळाच्या पिरंगुट इंग्लिश स्कूलमधील विज्ञान प्रदर्शनात 565 प्रकल्पांचे सादरीकरण
मुळशी । माजी केंद्रीय कृषी मंत्री शरद पवार यांच्या वाढदिवसानिमित्त पुणे जिल्हा शिक्षण मंडळाच्या पिरंगुट इंग्लिश स्कूल आणि ज्युनिअर कॉलेज ऑफ सायन्स विद्यालयात दोन दिवसीय विज्ञान प्रदर्शनाचे आयोजन करण्यात आले होते. या विज्ञान प्रदर्शनाचे उद्घाटन मुळशी पंचायत समितीच्या माजी उपसभापती सविता पवळे आणि सरपंच मनीषा पवळे यांच्या हस्ते झाले. यावेळी प्राचार्य डॉ. गौतम पिसे, उपप्राचार्य रामदास कुसाळकर, ग्रामपंचायत सदस्या मंदा पवळे, माजी उपसरपंच अंकुश नलावडे, मुळशी तालुका कुस्तीगीर संघाचे सदस्य संतोष दगडे आदी उपस्थित होते.
ऊर्जा बचतीचा संदेश
मुळशीतील पुणे जिल्हा शिक्षण मंडळाच्या पिरंगुट इंग्लिश स्कुल, न्यू इंग्लिश स्कुल घोटावडे, मामासाहेब मोहोळ विद्यालय मुठा, न्यू इंग्लिश स्कुल शेरे, श्री छत्रपती शिवाजी विद्यालय पौड व न्यू इंग्लिश स्कूल कोळवण शाखेतील विद्यार्थी यात सहभागी झाले होते. यामध्ये विद्यार्थ्यांनी ऊर्जा बचत, वाहतूक दळणवळण, आरोग्य, गणितीय प्रतिकृती, स्मार्ट सिटी प्रकल्प, सोलर चार्जर मोबाइल कव्हर, व्हक्यूम क्लिनर, वॉटर अलार्म, मागनेटिक इंडक्शन, ह्युमन रोबोट, हायड्रोलिक जेसीबी, संरक्षक बूट, फवारणी यंत्र, वॉशिंग मशीन आदी प्रकल्प सादर केले होते. स्पर्धेचे परीक्षण व्ही. एस. शिंदे, पी. ए. इनामदार, एस. डी. मोहोळ यांनी केले.
दोन गटात स्पर्धा
या स्पर्धेसाठी पाचवी ते आठवी आणि नववी ते बारावी असे दोन गट करण्यात आले होते. या विज्ञात प्रदर्शनात पाचवी ते आठवी गटात 265 आणि नववी ते बारावी या गटात 300 असे एकूण 565 प्रकल्पांचे सादरीकरण करण्यात आले. शाळा पातळीवर आणि तालुका पातळीवर असे प्रत्येकी तीन क्रमांक काढण्यात आले.
विद्यार्थ्यांनी मारली बाजी
पाचवी ते आठवी गटात साईराम बच्छाव वाघचौरे, अनिकेत संजय सातपुते आदित्य युवराज मोहोळ, नववी ते बारावी गटात हर्षल तुकाराम कांबळे, राहुल सुभाष दुडे, स्नेहल दत्तात्रय तापकीर यांनी अनुक्रमे प्रथम, द्वितीय आणि तृतीय क्रमांक पटकाविला. शाळा पातळीवर तन्वी अर्जुन बग्गर, अथर्व अनिल आहेर, साईराज यशवंत अमराळे, हर्षल तुकाराम कांबळे, प्रथमेश पांडुरंग तोंडे, अदनान उदरीस शाह यांनी बाजी मारली.