ट्रक चोरीप्रकरणी तिघांना 20 पर्यंत कोठडी
जळगाव। पॉलिस्टर व सिन्थेटीकचे धागे बनविण्यासाठी लागणारा 25 लाखाचा रुपये किंमतीच्या कापसाच्या गाठी घेवून गुजरातमधून नागपूरकडे जाणारा ट्रक जळगावातून गायब झाल्याची घटना घडल्यानंतर एमआयडीसी पोलिसात गुन्हा दाखल करण्यात आला होता. याप्रकरणी पोलिसांनी ट्रकचालकानंतर आता पुन्हा तीन जणांना अटक केली आहे. मंगळवारी तिघांना न्यायाधीश आर.डी.सिदनाळे यांच्या न्यायालयात हजर केले असता त्यांना 20 जुलैपर्यंत पोलिस कोठडी सुनावली आहे.
ट्रकची लावली विल्हेवाट…
गुजरात येथील भरुच येथून कापसाच्या गठाणी नागपूर येथे घेवून जाणार्‍या ट्रक क्रमांक सीजी.04.जेबी.1479 मधील 25 लाखांचा मुद्देमाल परस्पर लांबवून नेल्याप्रकरणी प्रकाश मंडलीक यांच्या फिर्यादीवरून फसवणुकीचा गुन्हा दाखल करण्यात आला होता. यानंतर पोलिसांनी लागलीच ट्रकचालक तस्लीम खान याला अटक न्यायालयात हजर केले असता त्याला पोलिस कोठडी सुनावली होती. दरम्यान, पोलिस इतर संशयितांच्या शोधार्थ असतांना सैय्यद मोसीम सैय्यद मस्ताक व जाबीर शेख शाबीर शेख यांना ट्रक चोरीप्रकरणी सोमवारी अटक केली असता त्यांनी चोरी केलेला ट्रक मोडून त्यातील माल इतर दुसर्‍या ट्रकांमध्ये भरल्याची माहिती दिली. मंगळवारी पुन्हा पोलिसांनी एका संशयिताची माहिती मिळताच त्यांनी यासीन खान मासून खान याला अटक केली आहे. तसेच मंगळवारी दुपारी सैय्यद मोसीम सैय्यद मस्ताक व जाबीर शेख शाबीर शेख तसेच यासीन खान मासून खान या तिघांना न्यायाधीश आर.डी.सिदनाळे यांच्या न्यायालयात हजर करण्यात येवून तिघांना 20 जुलैपर्यंत पोलिस कोठडी सुनावली आहे.