डॉ.पायल तडवी आत्महत्या प्रकरण: मुख्यमंत्र्यांच्या आदेशानंतर तपास गुन्हे शाखेकडे वर्ग

मुंबई: नायर रुग्णालयातील डॉ. पायल तडवी याने वरिष्ठ डॉक्टरांच्या छळाला कंटाळून आत्महत्या केली. या आत्महत्या प्रकरणी तपास आता आग्रीपाडा पोलीस ठाण्याकडून गुन्हे शाखेकड़े वर्ग करण्यात आले आहे. डॉ.पायल तडवी आत्महत्या प्रकरण गुन्हे शाखेकडे वर्ग करण्याचे आदेश मुख्यमंत्री देवेंद्र फडणवीस यांनी दिले होते. २२ मे रोजी ही धक्कादायक घटना घडली तेव्हापासून आग्रीपाडा पोलीस या घटनेचा तपास करत होते. मात्र, या गुन्ह्याची गंभीरता आणि महत्व लक्षात घेता गुन्हे शाखेकडे पायलच्या आत्महत्येचा तपास वर्ग करण्यात आला आहे.

डॉ. पायल तडवी आत्महत्येप्रकरणी आग्रीपाडा पोलिसांनी अटक केलेल्या डॉ. भक्ती मेहरे, डॉ. हेमा आहुजा आणि डॉ. अंकिता खंडेलवाल यांना आज सत्र न्यायालयातील विशेष न्यायालयात हजर करण्यात आलं. त्यावेळी पोलिसांनी या प्रकरणी अधिक तपासासाठी १४ दिवसांची पोलीस कोठडी मागितली होती. मात्र, न्यायालयाने डॉक्टरांना ३१ मेपर्यंत पोलीस कोठडी सुनावली आहे. मात्र पायलच्या या प्रकरणाला आता वेगळंच वळण लागण्याची शक्यता आहे. काल सुनावणीदरम्यान न्यायालयात पायलची बाजू मांडणारे वकील नितीन सातपुते यांनी पाटीलच्या मानेवर, पाठीवर आणि गुप्तांगावर जखमा असल्याचे शवविच्छेदन अहवालात नमूद केले असल्याने ही आत्महत्या नसून हत्या केली असल्याचा दावा केला आहे. त्यामुळे गुन्हे शाखा या अतिशय गंभीर अशा गुन्ह्याच्या मुळाशी जाण्याची शक्यता आहे.